Atyraýlyq hakerge qatysty qylmystyq is sotta qaralyp jatyr
ATYRAÝ. KAZINFORM — Atyraýda «Haker Atyraý» laqap atymen tanylǵan Nurlan Jańbyrbaevqa qatysty qylmystyq is qaralyp jatyr. Oǵan birneshe márte alaıaqtyq jasady degen aıyp taǵylǵan.
Qylmystyq is boıynsha 12 adam jábirlenýshi dep tanylǵan, bereshek somasy 13 mln teńgege jýyqtaıdy.Atyraýlyq haker sot otyrysynda berejaǵynyń 9 mıllıon teńgesin ótep úlgergenin aıtty.
Memlekettik aıyptaýshy Abylaıhan Abýjanovtyń aıtýynsha, buǵan deıingi sot otyrystarynda birneshe jábirlenýshi jaýap bergen. Qalǵan tórt jábirlenýshi búgingi sot otyrysyna túrli sebeppen qatyspady.
— Іs boıynsha tanylǵan kýálardan da jaýap alamyz. Sodan keıin is materıaldary zerdelenip, sot jaryssózine kóshemiz. Jalpy zańda úsh jyldan jeti jylǵa deıin bas bostandyǵyn shekteý nemese bas bostandyǵynan aıyrý jazasy qarastyrylǵan. Naqty jaza sot úkiminde belgili bolady, — dedi memlekettik aıyptaýshy.
Kezekti sot otyrysy 6 qarashaǵa belgilendi. Qazir Nurlan Jańbyrbaev úıqamaqta otyr.
Aıyptalýshynyń aıtýynsha, ol 2021 jyly «Jetý» atty taksı qyzmetine arnalǵan qosymsha jasap, jobaǵa ınvestıtsııa tartqan. 2024 jyly basqa kompanııa jobany kóshirip alǵannan keıin bıznesi toqtap, qaryzy 100 mln teńgege deıin jetkenin málimdedi.
Jańbyrbaevtyń sózinshe, 2025 jyly ózine qatysty qylmystyq is qozǵalǵannan keıin Dýbaıǵa ketken. Sol jaqta jumys istep, beresheginiń basym bóligin qaıtarǵanyn aıtty.
Ol Túrkııada ustalýyna qatysty da túsinikteme berdi. Aıtýynsha, 28 qańtarda Samsýn qalasynda ustalyp, keıin Ankaraǵa jetkizilgen. 18 maýsymǵa deıin deportatsııalyq mekemede bolǵanyn, odan soń Almatyǵa jetkizilgenin málimdedi. Keıin Aqtóbege, odan Atyraýǵa jetkizilip, sot sanktsııasymen úıqamaqqa shyqqanyn aıtty.
Sondaı-aq Jańbyrbaev áleýmettik jelide taraǵan, ony polıtsııa qyzmetkerleri qolyn qaıyryp alyp bara jatqan sáti beınelengen vıdeo ózi emes ekenin jetkizdi.
Aıta keteıik, Nurlan Jańbyrbaev «hacker.atyrau» paraqshasy arqyly Qyzylqoǵa aýdany Jangeldın aýylynda joǵalǵan otbasy týraly aqparat taratqan edi. Bul áreketine qatysty ázirge is qozǵalmaǵan. Qylmystyq is Atyraý qalalyq № 2 sotynda qaralyp jatyr.
Eske salaıyq, 2026 jylǵy 9 qańtarda Atyraý qalasynyń mamandandyrylǵan tergeý soty kúdiktige qatysty syrttaı qamaýda ustaý túrindegi bultartpaý sharasyn sanktsııalady. Sol kúni ol halyqaralyq izdeýge jarııalandy.
