Atyraýlyq hakerge halyqaralyq izdeý jarııalandy
ATYRAÝ.KAZINFORM – 31 jastaǵy Atyraý oblysynyń turǵynyna halyqaralyq izdeý jarııalandy. Ol hacker.atyrau paraqshasy arqyly Qyzylqoǵa aýdany Jangeldın aýylynda joǵalǵan otbasy týraly tyń derekterdi áleýmettik jelide taratqan edi.
Polıtsııa ony bul is-áreketi úshin emes, osyǵan deıin jasaǵan quqyqbuzýshylyǵyna baılanysty izdep jatyr. Quzyrly organ bergen málimetke súıensek, ol alaıaqtyq jasady degen kúdikke ilingen. Oǵan qatysty 4 qylmystyq is tirkelgen.
- Joǵalǵan otbasy musheleriniń júrgen jerine qatysty barlyq derek ishki ister organdarynyń bólimsheleri júrgizgen zańdy jedel-izdestirý jáne tergeý sharalary barysynda anyqtalǵan. Bul aqparat áleýmettik jelilerde jarııalanymdar paıda bolǵanǵa deıin resmı túrde tirkelip, keıinnen baǵdar túrinde rásimdelgen. Atalǵan tulǵa jańa derekter alǵan joq jáne eshqandaı derbes tehnıkalyq taldaý júrgizbegen. Onyń jarııalaǵan málimetteri resmı baǵdarmen tolyq sáıkes keledi jáne ol aqparatty baǵdar jasalǵannan keıin ǵana alǵan, - dep habarlady oblystyq PD.
Eske salsaq, Jangeldın aýylynda turatyn otbasy 2025 jyldyń sońyna belgisiz jaǵdaıda joǵalyp ketken edi.
6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy. Keıin erli-zaıyptynyń denesinen pyshaq izderi anyqtalǵanyn jazdyq.
Osyǵan deıin Atyraý oblysy Qyzylqoǵa aýdanynda joǵalǵan turǵyndardyń esepshoty ýaqytsha buǵattalatynyn, sol úıdegi qyz ben kúıeýbalanyń shetel asyp ketkenin jazǵanbyz.
9 qańtarda Atyraý oblysynda otbasy múshelerin óltirdi degen kúdikke ilingen marqumdardyń kúıeý balasy Sultan Sarsemalıev ekeni resmı túrde belgili boldy.
Ázirge sol úıdiń eki balasy, Meıramgúl Qarabalına men Naýryz Muqanǵalıev tabylmady. Іzdestirý jumysy jalǵasyp jatyr.