Atyraýlyq ǵalymnyń shubat pen qyzylshadan jasaǵan sýsyny shyǵaryla bastady
ATYRAÝ. KAZINFORM — Halel Dosmuhamedov atyndaǵy Atyraý ýnıversıtetiniń professory, bıologııa ǵylymdarynyń doktory Sofııa Saǵyndyqovanyń túıe sútinen jasalatyn «Sofmaııa» atty jańa sýsyny shyǵaryla bastady. Jańa ónim Ǵylym jáne joǵary bilim mınıstrliginiń «Ǵylym qory» arqyly ǵylymı zertteý nátıjesin kommertsııalandyrý jobasy aıasynda granttyq qarjylandyrýǵa ıe bolǵan.
Professor Sofııa Saǵyndyqova – otandyq ǵylymdy damytýǵa aıryqsha eńbek sińirip júrgen, kóptegen ǵylymı patent alǵan ǵalym. Ol - elimizge belgili bıolog ǵalymdardyń biri, akademık Maııa Shyǵaeevanyń shákirti.
«Bul ǵylymı jańalyq 20 jylǵa jýyq zerthanalyq izdenisterde pysyqtaldy. Halyqaralyq jáne qazaqstandyq konkýrstarda talaı ret jeńiske jetken granttyq zertteý jobasy ekenin atap ótken jón. Minekı, alǵash ret Mańǵystaý oblysynda ornalasqan «AGARGAN» JShS men «Ǵylym qorynyń» birlese qarjylandyrýynyń nátıjesinde óndriske shyǵarý josparlanyp otyr. Ótken jyldyń sońyna qaraı mınıstrliktiń Ǵylym qory, ýnıversıtet jáne jeke seriktestik arasynda kelisimshart jasaldy. Jalpy joba quny 403 mıllıon teńgeden astam qarjyny quraıdy», - deıdi mınıstr Saıasat Nurbek.
Túıe sútine qyzylsha shyrynyn qosyp daıyndaǵan «Sofmaııa» sýsyny bıznes-seriktestiktiń dıstrıbıýtorlyq jelisi arqyly tutynýshylarǵa qoljetimdi bolady. Sebebi, atalǵan ónim adam aǵzasyna óte paıdaly, dárýmenderi mol, sýsamyr (qant dıabeti) dertimen aýyratyn naýqastarǵa taptyrmas ónim. Ana men balanyń ómirine qajetti taǵamdyq qorekterdi beretin organıkalyq sýsyn retinde usynylady. Elimizdiń batys aımaǵyndaǵy túıe sharýashylyǵymen aınalysatyn qojalyqtardyń sút ónimderin jańa tehnologııamen óńdep, saqtalý merzimin uzartý kózdelgen. Bul ishki-syrtqy naryqta básekege qabiletti shyryn bolmaq.
«Qazaqtyń zańǵar jazýshysy Muhtar Áýezovtiń «Ǵylym men mádenıet barlyq dúnıeniń altyn alqasy bolyp otyr» degeni bar. Atyraýlyq ǵalymnyń uzaq jyldar boıy zerttep kele jatqan irgeli jumysyna Ǵylym jáne joǵary bilim mınıstriligi atynan tolaǵaı tabystar tileımin. Igilikti jumystar halqymyzdyń paıdasyna jarap, otandyq ǵylymnyń damýyna zor úles qosa bersin», - deıdi mınıstr.
Eske sala ketelik, budan buryn Shubat pen qyzylshadan jasalǵan «Sofmaııa» degen sýsyn týraly jazǵan bolatynbyz.
