Atyraýlyq ǵalymdar uńǵyma ónimdiligin arttyrýdyń jańa tásilin usyndy
ATYRAÝ. KAZINFORM – Atyraýlyq ǵalymdar uńǵyma ónimdiligin arttyrýǵa baǵyttalǵan jańa tehnologııa ázirlep, oǵan patent aldy. Ónertabys «Uńǵyma ónimdiligin arttyrý jáne parafın men gıdrat tyǵyndarynyń paıda bolýynyń aldyn alýdyń biriktirilgen tásili jáne ony júzege asyrýǵa arnalǵan qurylǵy» dep atalady.
Jańa sheshim soraptyq-kompressorlyq qubyrlardy úzdiksiz qyzdyrýǵa arnalǵan aralas júıege negizdelgen. Onyń basty ereksheligi – dástúrli ınjenerlik tásilderdi kún energııasymen ushtastyryp, «jasyl» tehnologııa qaǵıdattaryn qoldanýynda. Bul óndiristegi energııa shyǵynyn azaıtyp, tıimdilikti arttyrýǵa múmkindik beredi.
Tehnologııa uńǵyma ishinde parafın men gıdrattardyń túzilýiniń aldyn alýǵa baǵyttalǵan. Júıe qubyr ishindegi temperatýrany 5–10°C joǵary deńgeıde turaqty ustap turý arqyly shógindilerdiń paıda bolýyna jol bermeıdi. Nátıjesinde tereńdik soraptarynyń isten shyǵý qaýpi tómendep, óndiristegi irkilister azaıady.
S.Ótebaev atyndaǵy munaı jáne gaz ýnıversıtetiniń ǵalymdary bul máseleniń sala úshin ózektiligin atap ótti.
– Elimizdegi ken oryndarynda parafın túzilýi – eń kúrdeli ári jıi kezdesetin máselelerdiń biri. Ol uńǵymalardyń ónimdiligin tómendetip qana qoımaı, jabdyqtardyń isten shyǵýyna da ákelýi múmkin, - dedi tehnıka ǵylymdarynyń kandıdaty Maks Bısenǵalıev.
Onyń aıtýynsha, jańa ázirleme energııa tıimdiligi turǵysynan da tıimdi.
– Usynylyp otyrǵan júıe gıbrıdti qorektendirý arqyly jumys isteıdi. Bul dástúrli energııa kózderimen qatar kún energııasyn paıdalanýǵa múmkindik beredi. Sonyń nátıjesinde óndiris shyǵyndary azaıyp, ekologııalyq áser tómendeıdi, - dep tolyqtyrdy Maks Bısenǵalıev.
Mamandardyń pikirinshe, mundaı tehnologııalar munaı-gaz salasyndaǵy óndiristik turaqtylyqty qamtamasyz etedi.
Osyǵan deıin «QazMunaıGaz» qıyn óndiriletin qorlardan munaıdy ınnovatsııalyq tehnologııalarmen alyp jatqany jóninde jazǵan edik.
