Atyraýlyq eriktiler 130 mln teńgeniń negizsiz jumsalýyna jol bermedi

ATYRAÝ. KAZINFORM — Atyraýda sybaılas jemqorlyqqa qarsy eriktiler bıýdjettiń 130 mln teńgeden astam qarjynyń negizsiz jumsalýyna jol bermedi.

Sybaılas jemqorlyqqa qarsy is-qımyl agenttigi Atyraý oblystyq departamentiniń baspasóz qyzmetinen málim etkendeı, sybaılas jemqorlyqqa qarsy eriktiler tabıǵı sıpattaǵy tótenshe jaǵdaı rejımine baılanysty bıýdjet qarajatynyń tıimdi jumsalýyn baqylaýǵa alǵan.

«Elimizde memlekettik jáne jergilikti atqarýshy organǵa qyzmetter, is-sharalar boıynsha artyq shyǵyndardy qysqartý jóninde tapsyrmalar berilgen edi. Alaıda, keıbir memlekettik organdar bul tapsyrmany oryndamaıtyny anyqtaldy. Mysaly, Jylyoı aýdanynyń mádenıet, tilderdi damytý, dene shynyqtyrý jáne sport bólimi jalpy somasy 22 mln 321 myń 429 teńgege ulttyq at sporty túrleri boıynsha jarystar ótkizýdi josparlaǵan. Jylyoı aýdany sáýir aıynda sý tasqynynan zardap shekkenin, áli kúnge deıin saldaryn joıyp jatqanyn eskersek, atalǵan jarysty ótkizý ózekti emes bolyp sanalady. Osyǵan baılanysty eriktilerdiń usynysymen satyp alý konkýrsy tolyǵymen toqtatyldy», -dep habarlady departamenttiń baspasóz qyzmeti.

Osyǵan uqsas jaǵdaı Mahambet aýdanynda baıqalyp otyr.

Aýdandyq bilim bólimine qarasty Q.Qalybekov atyndaǵy Sarytoǵaı orta mektebi 16 mln 607 myń 142 teńgege 2 dana ulttyq kıiz úı satyp almaq bolǵan.

Bir kıiz úıdiń baǵasy — 8 mln 303 myń 571 teńge. 

«Eriktiler júrgizgen monıtorıng kezinde uqsas taýardyń medıanalyq baǵasy 2 mln 650 myń teńgeni quraıtyny anyqtaldy. Monıtorıng nátıjesimen satyp alý joıylyp, bıýdjet qarajatynyń tıimsiz jumsalýyna jol berilmedi. Jyl basynan beri sybaılas jemqorlyqqa qarsy eriktiler 130 mln teńgeden astam bıýdjet qarajatyn únemdedi», -dep málim etti departamenttiń baspasóz qyzmetinen.

Eske sala ketelik, buǵan deıin Atyraýda seriktestik dırektorynan 6 mln teńge para alǵan sheneýnik 4 jylǵa sottalǵanyn jazǵan edik.