Atyraýlyq dzıýdoshy yntalandyrý aqysyn tólemegen mınıstrlikti sotqa berdi
ATYRAÝ. KAZINFORM – Sportshyǵa halyqaralyq sport saıystarynan júldeli oryn alǵany úshin kótermeleý qarjysy tólenbegen. Ol osy jaǵdaıǵa baılanysty sottyń kómegine júgingen.
Joǵarǵy sottyń málimetinshe, Atyraý qalasynyń turǵyny, sport sheberi Týrızm jáne sport mınıstrligine 2021 jyly dzıýdodan Lıssabon qalasynda (Portýgalııa), 2023 jyly Astana qalasynda ótken sambodan Azııa jáne Okeanııa chempıonatynda, Oralda sambodan sheberler arasynda álem chempıonatynda, Ábý-Dabıde (BAÁ) dzıýdodan álem chempıonatynda júldeli oryndardy jeńip alǵany úshin kótermeleý tólemi týraly ótinish bildirgen. Dzıýdoshy mınıstrliktiń bas tartýyna sport ardagerlerine tólemdi kózdemeıtin ýákiletti organnyń Erejelerine silteme jasap, sotqa shaǵym túsirgen.
Mamandandyrylǵan aýdanaralyq ákimshilik soty atalǵan isti zertteı kele, mynadaı jaıtqa nazar aýdaryp otyr.
– Erejege sáıkes, árbir alǵan oryny úshin halyqaralyq jarystardyń árbir chempıony men júldegerine, jeke sport túrleri boıynsha ulttyq qurama múshelerine 100 paıyz aqshalaı yntalandyrý tólenedi. Al halyqaralyq jarystardyń jeńimpazdary – sport ardagerlerine kótermeleý tóleýge tikeleı tyıymdar joq. Talap qoıýshy Qazaqstan Respýblıkasynyń atynan basqa elderdiń sportshylarymen birge jarysqa qatysyp, qatysýshy-elderdiń jalpy medaldyq esebinde esepke alynǵan júldeli oryndarǵa ıe bolǵan. Mysaly, Oralda sambodan ótken álem chempıonatyna álemniń 20-dan astam elinen 550-den astam sportshy qatysqan. Mınıstrlik senim bildirý quqyǵyn qorǵaý qaǵıdatyn (QR Ákimshilik rásimdik-protsestik kodeksiniń 13-baby) buzǵan. Bul ákimshilik organnyń zańsyz áreketinen ákimshilik rásimge qatysýshy úshin aýyr zardaptarǵa jol berilmeıtinin kórsetedi, - dep habarlady sottan.
Osyǵan baılanysty sport sheberiniń talap qoıýy qanaǵattandyrylǵan. Sot mınıstrlikti álem chempıonatynda júlde alǵany úshin aqshalaı yntalandyrý tóleýge mindettedi.
Sot sheshimi zańdy kúshine engen joq.
Eske sala keteıik, budan buryn atyraýlyq sportshy kómir tıelgen 94 tonnalyq vagondy súıregenin jazǵan edik.