Atyraýlyq bapker dzıýdodan sport sheberleri arasynda álem chempıony atandy
ATYRAÝ. KAZINFORM – Atyraýlyq bapker Meırambek Esmaǵambetov dzıýdodan sport sheberleri arasynda álem chempıonatyna qatysty. Ol 4 qarsylasyn utyp, álem chempıony atandy.
Atyraý qalasyndaǵy №3 balalar men jasóspirimder sport mektebiniń dırektory Asan Raýshanovtyń aıtýynsha, dzıýdodan sport sheberleri arasyndaǵy álem chempıonaty AQSh-tyń Las-Vegas shtatynda ótken. Álemdik dodada 60-tan astam elden 2 myńǵa jýyq sportshy baq synaǵan.
«Bul dodada el namysyn Atyraý qalasyndaǵy №3 balalar men jasóspirimder sport mektebiniń aǵa jattyqtyrýshysy Meırambek Esmaǵanbetov qorǵady. Onyń maqsaty – osyndaı álemdik saıystardyń shyńyn baǵyndyryp, elimizdiń abyroıyn asqaqtatý. Ol osy dodada óziniń sheber sportshy ekenin dáleldep, 4 qarsylasyn aıqyn basymdyqpen utty», - deıdi Asan Raýshanov.
Onyń aıtýyna qaraǵanda, 37 jastaǵy aǵa jattyqtyrýshyny Meırambek Esmaǵanbetovti bul chempıonatqa Paradzıýdodan el quramasynyń bas bapkeri Jandos Qııanov daıyndaǵan.
«Meırambek Esmaǵambetovtiń buǵan deıingi jetistigi az emes. Ol – budan buryn birneshe respýblıkalyq, qurlyqtyq chempıonattardyń júldegeri bolǵan. Onyń enshisinde Qazaqstan spartakıadasynyń, jastar arasyndaǵy el chempıonatynyń, 2023 jyly ótken sport sheberleri arasyndaǵy Azııa oıyndarynyń, álem chempıonatynyń qola júldesi bar», - dep málim etti Asan Raýshanov.
Eske sala ketelik, buǵan deıin Atyraýlyq órt sóndirýshi paýerlıftıngiden álem chempıony atanǵanyn habarlaǵan bolatynbyz.
