Atyraýlyq balalar dalada túnep júrgen: ata-anasyn quqyǵynan aıyrǵaly jatyr

ASTANA. KAZINFORM — Atyraýda bir úıdiń eki balasy ata-anasynyń qaraýynsyz dalada túnep júrgeni anyqtaldy. Іstiń mán-jaıyn quzyrly organdardan surap bilgen edik. 

Atalǵan máseleni jeli qoldanýshysy kóterip, balalardyń ata-anasy ishimdikke salynǵanyn jazdy. Aıtýynsha otbasy esepte turǵan jáne atalǵan otbasyndaǵy balalardyń quqyǵyn qorǵaý máselesi buǵan deıin de aıtylǵan.

— Tekserý nátıjesinde ata-ana balalarynyń tárbıesi men qaýipsizdigine jaýapsyz qaraǵany anyqtaldy. Osyǵan baılanysty 14 jastaǵy jasóspirim kámeletke tolmaǵandardy beıimdeý ortalyǵyna, al 3 jasar bala sábıler úıine ornalastyryldy, — degen jaýap aldyq Atyraý oblysy polıtsııa departamentiniń baspasóz qyzmetinen.

Jergilikti polıtsııanyń málimetinshe, ata-anamen buǵan deıin birneshe ret profılaktıkalyq áńgime júrgizilgen.

— Sonymen qatar ata-ana budan buryn mindetterin tıisinshe oryndamaǵany úshin ákimshilik jaýapkershilikke tartylǵan. Qazir is-qujattar jınaqtalyp, ata-ana quqyǵynan aıyrý máselesin qaraý úshin kámeletke tolmaǵandardyń isi jónindegi komıssııaǵa joldanyp jatyr, — deıdi vedomstvodan.

Atalǵan jaıtqa qatysty Oqý-aǵartý mınıstrligi Balalardyń quqyǵyn qorǵaý komıteti de túsinik berdi.

— Qazir aǵaly-qaryndas qaýipsiz jerde. Olarǵa barlyq qajetti kómek, onyń ishinde psıhologııalyq qoldaý kórsetilip jatyr. Oqýshy er bala oqýǵa qajetti quraldarmen qamtamasyz etildi, — dep túsindirdi jaǵdaıdy.

Osy oraıda Balalardyń quqyǵyn qorǵaý komıteti de balalardyń ata-anasyn quqyǵynan aıyrý máselesi qaralatynyn habarlap otyr. Másele óńirlik Bala quqyqtary jónindegi ýákildiń baqylaýyna alyndy.

Eske salaıyq, balalardy qalaı qorǵaımyz degen taqyrypqa sholý jasaǵan edik. 

Aıta ketsek, Prezıdent 1 maýsym halyqaralyq balalardy qorǵaý kúninde memleket balalardyń jan-jaqty damýyna barlyq jaǵdaıdy jasala beretinin basa aıtty.