Atyraýlyq aspaz Jaıyq jaǵalaýyn bekitip júrgenderge tegin tamaq ázirledi
ATYRAÝ. KAZINFORM – Atyraýdaǵy meıramhananyń bas aspazy Jaıyq ózeniniń jaǵalaýyn bekitip júrgenderge tegin tamaq ázirledi.
Atyraý oblysy jedel shtabynyń aqparatyna súıensek, barmaǵynan bal tamǵan jergilikti aspaz Baǵdat Qadyrov munaıly shahardaǵy «CJ-cafe», «SHarbaq» meıramhanalarynda jumys isteıdi.
Onyń aspaz bolǵanyna 15 jyl ótken. Jumysyna qosa fýd-blogerlikpen aınalysady.
«Jergilikti aspaz Baǵdat Qadyrov Jaıyq ózeniniń jaǵalaýyn bekitýge jumylǵan azamattarǵa túski jáne keshki as daıyndap berip júr. Ol tamaqty óz qarajaty esebinen daıyndaıdy. Atyraý qalasynyń mańyndaǵy Erkinqala, Damby, Talǵaıran eldi mekenderinde, Mahambet aýdanynyń Taldykól aýylynda aspazdyq etti. Aspaz jigit bul qadamǵa óz qalaýymen barǵan», - dep habarlady oblystyq jedel shtab.
Ótken jyly Baǵdat Qadyrov Antalııada ótken álemdik aspazdar saıysyna qatysqan. Sol saıyta 750 aspazdyń arasynan jeńimpaz atanǵan.
Eske sala ketelik, budan buryn Tasqyn sý Atyraýdyń soltústik bóligindegi eldi mekenderge qaýip tóndirip turǵanyn habarlaǵan edik.
