Atyraýlyq ardager balýan dzıýdodan álem chempıony atandy

Atyraýlyq ardager balýan Maral Kóshenov qyrkúıekte sambodan álem chempıony atanǵan edi. Endi ol dzıýdodan álem chempıony atanyp otyr, dep habarlaıdy Kazinform.

Oblystyq dene shynyqtyrý, sport jáne týrızm basqarmasy baspasóz qyzmetiniń málimetinshe, ardager sportshylar arasyndaǵy álem chempıonaty 30 qazan men 4 qarasha aralyǵynda ótken.

– Birikken Arab Ámirlikteri eliniń astanasynda «Abu Dhabi World Championships Veterans 2023» chempıonatynyń jalaýy jelbiredi. Álemdik dodaǵa 64 eldiń 1 myńnan astam sportshysy baq synady. Atyraýlyq ardager balýan Maral Kóshenov M7, -73 keli salmaqta qarsylastarynyń bárin tize búktirip, álem chempıony atandy, - dep habarlady basqarmanyń baspasóz qyzmeti.

Maral Kóshenovtiń salmaǵynda 17 balýan synǵa túsken. Ol qarsylastarymen tórt kezdesý ótkizgen.

– Aldymen Brazılııanyń sportshysymen kúrestim. Ekinshi jekpe-jekte aýstrııalyq qarsylaspen kúsh synastym. Úshinshi kezdesýde taǵy bir brazııalyq sportshyny uttym. Aqtyq synda Ispanııa sportshysyn qapy qaldyryp, dzıýdodan alǵash ret álem chempıony atandym, - deıdi Maral Kóshenov.

Onyń aıtýynsha, bıyl tabysty jyl bolǵan. Qyrkúıek aıynda sambodan 71 keli salmaqta álem chempıony atanǵan. Azııa chempıonatynda da birinshi júldeni ıelengen. 

Eske sala ketelik, budan buryn Jeńis Nurlybaev djıý-djıtsýdan álemniń eki dúrkin chempıony atanǵanyn jazǵan bolatynbyz.