Atyraýlyq alpınıst 20 kúnde eki alyp shyńdy eńserdi

ATYRAÝ. KAZINFORM – Atyraýda taý joq. Degenmen shyńdardy baǵyndyrǵan Marına Malysheva sııaqty alpınıster  bar. Keıipkerimiz bıiktikten qoryqpaıdy, kerisinshe sol bıiktikte óz kúshin tolyq sezinedi. Kavkazdan bastalǵan bul jol ony Elbrýs pen Damavandqa, al armany — Everestke jetelep keledi.

Atyraýlyq Marına Malysheva 2023 jyldyń maýsym aıynda Kavkazǵa alǵash ret sapar shegip, taýlardyń sulýlyǵy men bıiktikten erekshe áser alady. Keıin bir aıdyń ishinde Elbrýstyń batys shyńyna kóteriledi. Araǵa eki jyl salyp, alpınıst nebári jıyrma kúnniń ishinde «7 janartaý» halyqaralyq jobasyna engen eki janartaýdy qatar baǵyndyrǵan.

Aldymen Reseı aýmaǵyndaǵy bıiktigi 5621 metr bolatyn Elbrýstyń Shyǵys shyńyna shyqsa, keıin Irandaǵy Azııanyń eń bıik janartaýy sanalatyn, teńiz deńgeıinen 5610 metr bıiktiktegi Damavand shyńyn eńsergen. Árbir shyńdy eńserý – el mereıin asqaqtatatyn jetistik. Sondyqtan Marına árbir saparynda mindetti túrde Qazaqstannyń Týyn ózimen birge alyp shyǵady.

– Alpınızm – ońaı sport emes, ári qarjylaı shyǵyny da kóp. Sonymen qatar bul sport túri joǵary fızıkalyq daıyndyqty jáne turaqty kúshtik jattyǵýlardy da talap etedi. Alpınızmge fızıkalyq daıyndyq – tek syrtqy forma úshin emes, eń aldymen qaýipsizdik pen ómiriń úshin qajet. Taýda túrli jaǵdaılar bolýy múmkin. Sol sátte adam denesi myqty bolyp qana qoımaı, ózin qutqarýǵa qaýqarly bolýy tıis. Sondyqtan men júıeli túrde jattyǵamyn. Sonymen qatar, óz salmaǵymmen jattyǵýlar jasap, uzaq jaıaý kardıo jattyǵýlardy mindetti túrde oryndaımyn, - dedi Marına Malysheva.

Óńirimizde taýlar men arnaıy jattyǵýǵa arnalǵan skalodrom bolmasa da, bul Marınanyń osy qyzyqty ári kúrdeli sport túrimen aınalysýyna esh kedergi emes. Onyń mamandyǵy — lıngvıst-aýdarmashy. Alaıda qazirgi tańda fıtnes-trener bolyp eńbek etedi.

– Marına – maqsatyna berik adam. Eger bir nárseni oılasa, sońyna deıin jetkizedi. Bul sportta eń aldymen tózimdilik pen rýhty kúsh qajet, sebebi taýǵa shyǵý ońaı emes. Onda ottegi jetispeıdi, myqty aıaq pen shydamdylyq kerek. Jattyǵýsyz mundaı jetistikke jetý múmkin emes. Al Marına únemi eńbektenedi. Onyń ústine, ol taýǵa tórt ret shyqqan. Muny kez kelgen er adam jasaı almaıdy dep oılaımyn, - deıdi Marına Malyshevanyń áriptesi Aleksandr Borodın.

Marınanyń eń úlken armany — Nepalǵa baryp, Gımalaı taýlaryn kórý jáne jer betindegi eń bıik shyń — Everesti baǵyndyrý.

Eske salaıyq, osyǵan deıin 55 jastaǵy Kamı Rıta Everest taýyn 31-shi ret baǵyndyrǵany jóninde jazǵan edik.