Atyraýlyq 12-synyp oqýshysy AQSh-taǵy 6 ýnıversıtetten oqýǵa shaqyrtý aldy

ATYRAÝ. KAZINFORM – Atyraýda NIS mektebiniń 12-synyp oqýshysy AQSh-taǵy 6 ýnıversıtetten mýzykalyq ındýstrııa baǵytynda bilim alýǵa shaqyrtý aldy.

Atyraýlyq jas óren Ámına Qurbanova NIS mektebiniń 12-synybynda oqıdy. Onyń vokaldyq qabiletine Amerıkanyń Berklee College of Music, Drexel University, University of the Pacifi, Appalachian State University, Loyola University New Orleans, University of Hartford sekildi joǵary oqý oryndary qyzyǵýshylyq tanytyp otyr.

«Án álemine qyzyǵýshylyǵym horǵa qatysýdan bastaý aldy. Alǵashqyda horda án aıttym. Keıin jeke aıtý úshin arnaıy dáris alýdy bastadym. Sodan beri vokal meniń shyǵarmashylyǵyma aınaldy. Bıyl mektepti bitiremin. Soǵan baılanysty mamandyq tańdaıtyn sát jaqyndaǵanda, uzaq oılandym. Kóp izdenisten keıin mýzyka ındýstrııasyndaǵy bıznes jáne menedjment boıynsha bakalavr baǵdarlamasyn taptym. Keıin bul óte jaqsy tańdaý ekenin túsindim. Óıtkeni bul baǵdarlamamen mýzyka men qarjy, bıznes jáne taǵy basqa salalarda akademııalyq bilimdi biriktirýge múkindik beredi», - deıdi Ámına Qurbanova.

Atyraýdaǵy hımııa-bıologııa baǵytyndaǵy NIS zııatkerlik mektebi basshylarynyń málimetinshe, bilim ordasyn bitirgen 15 túlek shetelderde joǵary bilim alyp júr. Al, bıyl 12 túlekke sheteldiń ýnıversıtetterinen shaqyrý kelgen. 

Eske sala ketelik, buǵan deıin Atyraý oblysynda 149 myń oqýshy jıyntyq baǵalaýdan bosatylǵanyn jazǵan edik.