Atyraýlyq 11 jasar sportshy júzýden Qazaqstan rekordyn jańartty

ATYRAÝ. KAZINFORM – Atyraýlyq 11 jasar sportshy Janseıit Janbosyn 50 metrge butterfly stılinde júzýden jasóspirimder arasynda Qazaqstan chempıony atandy. Ol bul qashyqtyqty 31,72 sekýndta eńserip, alty jyl burynǵy el rekordyn jańartty. 

Atyraý oblysynyń júzýden qurama komandasynyń bas bapkeri Ivan Galkınniń aıtýynsha, Kókshetaýda «Býrabaı injý-marjany» respýblıkalyq týrnırine 300-ge jýyq sportshy qatysqan.

«Týrnır qorytyndysynda sportshylardyń daıyndyq deńgeıiniń joǵary ekeni baıqaldy. Bul saıysqa Atyraý oblysynan 20 sportshy qatysty. Onyń ishinde Janseıit Janbosyn butterfly stıli boıynsha 50 metrge júzýden rekordty jańartty. Bul rekord sońǵy 6 jyl boıy jańarmaǵan edi. Ol buǵan qosa 50, 100, 200 metr qashyqtyqty krol ádisimen júzip, týrnırdiń «Úzdik sportshysy» atandy», - deıdi Ivan Galkın. 

Onyń deregine súıensek, Janseıit Janbosyn Atyraý qalasyndaǵy №17 mektep-lıtseıiniń 5-synybynda oqıdy. Jas sportshy alty jyl beri júzýmen aınalysyp keledi.

Al, taǵy bir atyraýlyq Aıana Sálı 100 metrge butterfly stılimen 1 mınýt 29,94 sekýndta júzip, jarystyń júldegeri atanǵan. 

Eske sala ketelik, budan buryn paravoleıboldan el quramasynyń 9 oıynshysy halyqaralyq dárejedegi sport sheberi atanǵanyn jazǵan bolatynbyz.