Atyraýǵa jaǵalaýdy nyǵaıtýǵa ózge óńirlerden qosymsha tehnıka jiberiledi
ATYRAÝ. KAZINFORM - Vıtse-premer, sý tasqynyna qarsy is-sharalardy úılestirý jáne sý tasqynynyń saldaryn joıý jónindegi respýblıkalyq shtab jetekshisiniń orynbasary Qanat Bozymbaev pen Atyraý oblysynyń ákimi Serik Shápkenov Jaıyq ózeni boıy aýmaǵyn áýeden barlady.
Olar jaǵalardy nyǵaıtý jáne damba salý boıynsha júrgizilip jatqan jumystarmen tanysty.
Bul gıdrobeketterde: Inderbor aýylynda 33 sm-ge jáne Mahambet aýylynda 60 sm-ge deıin sý deńgeıiniń kóterilgeni týraly sońǵy málimetke baılanysty ásire mańyzdy bolyp otyr.
Inder aýdanyndaǵy jaǵalaýdy nyǵaıtý jumystarynyń barysy tekserildi. 87 birlik tehnıka men 505 erikti jumyldyrylǵan.
14,9 shaqyrymǵa qum men 103,5 myń qap tóseldi.
Mundaı sharalar Mahambet aýdanynda da qolǵa alynyp, dambalardy nyǵaıtýǵa 4 myń erikti men 210 tehnıka jumyldyrylyp, 12,8 shaqyrymǵa qum tóseldi.
Qanat Bozymbaev Jaıyq ózeni boıyndaǵy kóne Saraıshyq qalashyǵyna bardy.
Vıtse-premer tarıhı eskertkish aýmaǵyn saqtaý jáne qorǵaý jumystaryn kúsheıtý jóninde tapsyrmalar berdi.
Aıta ketý kerek, Jaıyq jaǵalaýyn nyǵaıtý jumystary Atyraýda da júrgizilýde.
Jumysty tıimdi júrgizý úshin qala 107 ýchaskege bólingen, olardyń árqaısysyna jaýapty maman bekitilgen. Búginde 32 shaqyrym damba ornatylyp, 503 birlik tehnıka, 9 myńǵa jýyq erikti jumyldyrylǵan, 373 myń qap tóseldi.
Sondaı-aq Premer-Mınıstrdiń orynbasary Inder aýdanyndaǵy Qurylys jáne Jarsýat aýyldarynyń turǵyndarymen kezdesti.
Bul aýmaqta jaǵalaýdy qorǵaý jumystaryna aýyr tehnıka qajet. Qanat Bozymbaev Jambyl, Qyzylorda, Túrkistan jáne Mańǵystaý oblystarynan qosymsha tehnıka tartylatynyn aıtty.
Olar aýdan ákimderiniń bergen ótinishine qaraı taratylady.
Sonymen qatar Qorǵanys mınıstrligi tarapynan qosymsha kúsh-qural tartý boıynsha jumys júrgizilip jatyr.
Premer-Mınıstrdiń orynbasary Jaıyq ózeni boıyndaǵy osal tustardy odan ári nyǵaıtý boıynsha birqatar tapsyrma berdi.
Bul sharalar aldaǵy ýaqytta sý tasqynynyń aldyn alýǵa jáne eldi mekender men erekshe jerlerdi qorǵaýǵa baǵyttalǵan.
Úkimet tarapynan qajetti qoldaý kórsetiledi.
