Atyraýǵa tasqyn sýdyń kóp bóligi mamyr aıynyń basynda kelýi múmkin

ATYRAÝ. KAZINFORM – Atyraýlyq ǵalymdar óńirge tasqyn sýdyń kóp bóligi mamyr aıynyń basynda kelýi múmkin ekenine boljam jasap otyr.

Atyraý oblystyq jedel shtab janyndaǵy zertteýshi ǵalymdardyń jumysshy toby bar. Atalǵan toptyń múshesi Arman Jumaǵazıevtiń aıtýynsha, Jaıyqpen keletin mol sý mamyr aıynyń basynda ózenniń arnasyna shyǵyp, tasýy múmkin.  

«Sý tasqynyna baılanysty kóp jylǵy derekterdi saraptaý, eskerý kerek. Osy turǵydan burynǵy derekterge saralasaq, Atyraý oblysynyń aýmaǵyna tasqyn sýdyń kóp bóligi ádette mamyr aıynyń ortasynda kelgenin bilemiz. Biraq, bıylǵy jyly Reseı Federatsıasynyń aımaǵynan mol sý kelip, kóktemgi tasqynnyń erte bastalýyna sebep bolyp otyr. Batys Qazaqstan oblysynyń aýmaǵymen tómenge qaraı aqqan sý Atyraýǵa shamamen 6-7 kúnde keledi. Osyndaı boljamǵa súıensek, 2-3 mamyr kúnderi Jaıyq ózeniniń Atyraý oblysyndaǵy arnasy tolýy múmkin», - deıdi ǵalym Arman Jumaǵazıev.

Oblystyq jedel shtabtyń málimetinshe, búgin, 24 sáýirdegi tańerteńgi saǵat 08:00-de Atyraý qalasy gıdrobekette Jaıyq ózeniniń deńgeıi 422 sm-ge jetken. 

«Bul óńirde Jaıyq ózeniniń qaýipti deńgeıi – 550 sm. Sý tasqynynyń qaýpine baılanysty 24 sáýir kúngi málimet boıynsha Atyraý qalasyndaǵy Jaıyq jaǵalaýyna 229,6 shaqyrym bóget turǵyzyldy», - dep málim etti oblystyq jedel shtabtan.

Eske sala ketelik, budan buryn Atyraý oblysynda jaǵalaýǵa 2,7 mln qum toltyrylǵan qap tóselgenin jazǵan edik. 

Keıin Atyraýdyń Mahambet aýdanynda Jaıyq ózeniniń jaıylmasyna sý shyqqanyn habarlaǵan bolatynbyz. 

Sondaı-aq, Mahambet aýdanynda Jaıyq mańyndaǵy jyralar ashylyp  jatyr.