Atyraýǵa soltústik aınalma joldyń qurylysy ne úshin qajet
ATYRAÝ. KAZINFORM – Atyraý qalasynyń mańynda 2023 jyly soltústik aınalma joldyń qurylysy bastalǵan edi. Jalpy uzyndyǵy 27,5 shaqyrym bolatyn bul jol ne úshin qajet?
Atyraý oblysy ákiminiń orynbasary Qaırat Nurtaevtyń aıtýyna qaraǵanda, soltústik aınalma joldyń qurylysyn 2026 jyly aıaqtaý josparlanyp otyr.
– Osy kezge deıin jobaǵa sáıkes 7 shaqyrym joldyń negizgi qabaty salyndy. Asfalt jabynynyń astyńǵy qabaty tóseldi. Kópirdiń jáne jol aıryǵynyń qadalary ornatyldy. Soltústik aınalma jol ózge óńirlerden keletin júk kólikteriniń Atyraý qalasyna kirmeı-aq, Oral, Aqtaý, Aqtóbe jáne Reseı Federatsııasynyń shekarasy baǵytyndaǵy jolǵa shyǵýyna múmkindik beredi. Demek, aldaǵy ýaqytta bul joba kólik jáne logıstıka salasynyń ekonomıkalyq turǵydan tıimdiligin arttyrady, - deıdi Qaırat Nurtaev.
Onyń deregine qaraǵanda, atalǵan jobasy aıasynda Jaıyq ózeni men Saryózek kanaly arqyly ótetin kópirler salynady. Oǵan qosa úsh jol aıryǵy qarastyrylyp otyr. Jaıyq ózeniniń ústinen salynatyn kópir Atyraý-Oral jáne Atyraý-Inder jolyna qosylady.
– Oblys turǵyndaryn «Atyraý qalasynan Reseı Federatsııasynyń shekarasyna deıin qatynaıtyn joldyń 5 shaqyrymy qashan salynady?» degen saýal tolǵandyrady. Joldyń bul bóligin 1-shi sanatqa aýystyrý maqsatynda oblystyń kommýnaldyq menshigine aldyq. Jol bóligin rekonstrýktsııalaý úshin jobalyq-smetalyq qujat daıyndaldy. Jobaǵa memlekettik saraptamanyń oń qorytyndysy berildi. Barlyq qujatty Kólik mınıstrligi men «QazAvtoJol» UK» AQ-ǵa tapsyrdyq. Qurylys jumysyn bıyl bastaý josparlanyp otyr, - dedi Qaırat Nurtaev.
Eske sala ketelik, budan buryn Atyraýdan Reseı shekarasyna deıingi jol 6 jyldan beri bitpeı otyrǵanyn habarlaǵan edik.