Atyraýǵa Medına qalasynan charterlik reıs qondy
ATYRAÝ. KAZINFORM — Atyraý qalasyna Saýd Arabııasynyń Medına qalasynan ushyp kelgen charterlik reıs qondy. Arnaıy reısti Air Astana kompanııasy oryndady.
Jolaýshylardyń basym bóligi qajylyqqa baryp kelgender. Olar endi tańǵy reıstermen Almaty jáne Astana qalalaryna ushady.
Atyraýǵa qonǵan azamattar Taıaý Shyǵystaǵy jaǵdaıǵa baılanysty alǵashynda qorqynysh bolǵanyn jasyrmady. Biri Medınada birneshe kún artyq bolsa, ekinshilerine josparlanǵan ýaqyttan erte qaıtýǵa týra kelgen.
— Alǵashynda ýaıymdap qaldyq. Saparǵa shyǵar kezde, ıaǵnı ushaqqa otyramyz degende bolyp jatqan jaǵdaı týraly estidik. Biraz abyrjyp qalǵanymyz bar. 3 kún artyq boldyq. Shyny kerek, elge aman-esen qonǵanymyzǵa qýanyshtymyn, — dedi jolaýshy Máýlimhan Qazykenqyzy.
— Jalpy eshqandaı qorqynysh bolǵan joq. Áleýmettik jeliden jaǵdaıdy kórip otyrdyq. Dybystar estimedik. Osylaı din aman elge qonyp jatyrmyz. Osy úshin memleketke, týroperatorlarǵa raqmet, — dedi jolaýshy Erdáýlet Matkarımov.
Aldyn ala aqparat boıynsha Atyraýǵa keletin 3 charterlik reıste 600-ge jýyq adam bar. Qalǵan eki ushaq aldyn ala málimetke sáıkes saǵat tańǵy 3-4-tiń shamasynda Atyraý qalasyna qonady dep kútilip otyr.
Qazirgi ýaqytta H.Dospanova atyndaǵy halyqaralyq áýejaıynda jaǵdaı turaqty.Taıaý Shyǵystan kelgen jolaýshylar ishki reısterge tirkelip jatyr.
— Azamattarymyz elge aman-esen jetip jatyr. Birinshi reısten keıin Jıdda qalasynan qazaqatandyqtardy 2 ushaq Atyraýǵa jetkizedi. Taıaý shyǵystaǵy máseleler alańdatyp otyr. Degenmen baryp jatqan adamdar kelisimshart boıynsha kishi qajylyqtaryn ótep kelip jatyr, — dedi týroperator ókili Tursyn Ahmetov.
Osyǵan deıin 4 naýryzda Saýd Arabııasynyń Jıdda qalasynan 343 otandasymyzdy elge jetkizý josparlanyp otyrǵanyn jazǵan edik.