Atyraýǵa qosymsha muz aıdynyn salý máselesi 3 jyldan beri sheshilmeı keledi
ATYRAÝ.KAZINFORM – 2023 jyly Atyraýda taǵy bir muz aıdynyn salý máselesi kóterilgenmen, áli kúnge sporttyq nysan salynǵan joq. Tipti jobasy da jasalmaǵan.
Oblys ákimdigi ókilderiniń sózinshe, shaıbaly hokkeı men mánerlep syrǵanaýǵa bet burǵandar kóbeıgen. Ásirese, mánerlep syrǵanaý, shaıbaly hokkeı men kerlıng sekildi túrimen aınalysatyndardyń sany artqan. Hıýaz Dospanova atyndaǵy muz saraıy sportshylarǵa da, demalys kúnderi jappaı konkı tebýge keletin turǵyndarǵa da tarshylyq etýde. Sondyqtan ákimdik jańa muz aıdyny salý kerektigi týraly sheshimge kelgen edi.
Alaıda jańa muz aıdynynyń qurylysy bastalǵan joq. Qazirgi ýaqytta qazirgi muz aıdynynyń janynan jer telimi qarastyrylǵan. Ákimdik sporttyq nysandy salý jumysyn qarjylandyrý máselesin qarap jatyr.
- Qoldanystaǵy muz aıdynynda 07:00-20:00 aralyǵynda balalar kestege sáıkes jattyǵady. Qosymsha jer telimin qarastyryp jatyrmyz. Jer máselesi qalalyq ákimdik arqyly sheshiledi. Bul jobaǵa jeke ınvestordy tartý, memlekettik-jekemenshik áriptestik aıasynda nemese jobasyn jasap, qurylysty bastaý boıynsha jumystardy bastap kettik. Qazirgi ýaqytta joba jasaýǵa jumystanyp jatyrmyz, aldaǵy ýaqytta qosymsha muz aıdyny boı kóteretin bolady , - dedi oblystyq dene shynyqtyrý, sport jáne týrızm basqarmasynyń basshysy Nurbol Sydyqov.
Resmı málimetke súıensek, ótken jyldyń qorytyndysy boıynsha «Beıbarys Atyraý» sport klýbynda 306 sportshy shaıbaly hokkeı jáne mánerlep syrǵanaýmen aınalysýda. 2024 jylǵy kórsetkishpen salystyrǵanda 74 adamǵa kóp. 14 jattyqtyrýshy jumys isteıdi. Bıyl balalar akademııasyn ashý josparlanyp otyr.
Osyǵan deıin qysqy ýaqytta Pavlodarda 24 muz aıdyny jumys isteıtinin jazǵan edik.