Atyraýǵa kómekke barmaq bolǵan Túrkistan oblysynyń turǵynyn júk kóligi basyp qaldy
TÚRKІSTAN. KAZINFORM — Sý tasqynynan zardap shekken aımaqqa kómekke barmaq bolǵan turǵyndy óziniń júk kóligi basyp qaldy.
Oqıǵa Ordabasy aýdanyna qarasty Badam eldi mekenindegi temir jol stantsııasynda boldy. Qoǵam belsendisi Dıas Nuraqynnyń jazýynsha «hovo» júk kóligin vagonǵa tıep jatqanda kólik dońǵalaǵy taıyp ketip, ıesin basyp qalǵan. Saldarynan 7 balanyń ákesi 37 jastaǵy azamat oqıǵa ornynda qaıtys boldy.
Atalǵan jaǵdaı boıynsha kóliktegi polıtsııa departamentiniń baspasóz qyzmeti qazirgi tańda tergeý júrip jatqandyǵyn jetkizdi.
«Atalǵan fakt 13 sáýirde Shymkent stantsııasyndaǵy Jelilik polıtsııa bóliminiń sotqa deıingi tergep-tekserýdiń birińǵaı tizilimine eńbekti qorǵaý qaǵıdalaryn buzýy — abaısyzda adam ólimine ákep soqqan is-áreket boıynsha tirkeldi. Qazirgi ýaqytta tergeý amaldary júrgizilip jatyr. Ózge aqparat QR Qylmystyq-protsestik kodeksiniń 201-babynyń talaptaryna sáıkes jarııa etýge jatpaıdy» - delingen vedomstva aqparatynda.