Atyraýǵa qarasty aýdanda qatty jaýynnan keıin 1200-den astam qoı-eshki qyryldy
ATYRAÝ. KAZINFORM — Jylyoı aýdanynda maýsym aıynyń basynda bolǵan qolaısyz aýa raıy saldarynan birneshe sharýa qojalyǵy 1200-den asa bas usaq malynan aıyryldy. Qazir qyrylǵan maldardy joıý jumystary júrgizilip jatyr.
Jylyoı aýdandyq ákimdiginiń aqparatyna súıensek, 2-3 maýsymda Saryqasqa jáne Jeltaý aýmaqtarynda shamamen 15 saǵat boıy tolassyz nóser jańbyr jaýyp, ekpindi jel soqqan. Osydan keıin atalǵan aýmaqtarda qoı men eshki qyrylǵan.
Oqıǵa týraly habarlama túsken soń jaǵdaıdy zerdeleý úshin oqıǵa ornyna «Jylyoı aýdandyq veterınarııalyq stantsııasy» ShJQ KMK-nyń bes mamany men arnaıy tehnıka jiberilgen.
Tekserý nátıjesinde Qosshaǵyl aýyldyq okrýgi, Qulsary qalasy jáne Maıkómgen aýyldyq okrýgi aýmaǵyndaǵy sharýashylyqtarda barlyǵy 1238 bas usaq maldyń qyrylǵany anyqtaldy.
Mamandardyń aldyn ala boljamynsha, qyrqylǵan qoı-eshki uzaq ýaqyt jańbyr astynda qalyp qoıǵan. Jaýynnan keıingi batpaqqa batyp qalǵan.
— Jaılaýǵa kóshirilgen maldarǵa arnalǵan yqtaıtyn qora-jaılardyń bolmaýy da jaǵdaıdy kúrdelendirdi, — dedi Qosshaǵyl aýyldyq okrýginiń ákimi Janǵazy Erkinov.
Resmı aqparat boıynsha qazir qyrylǵan maldardy joıý jumystary júrgizilip jatyr.
Atyraýda 1–3 maýsym aralyǵynda aılyq jaýyn-shashyn normasynan 1,5 esege artyq jańbyr jaýǵanyn eske salaıyq.
