Atyraýǵa Grýzııanyń Borjomı qalasynan gýmanıtarlyq kómek keldi
ATYRAÝ. KAZINFORM – Atyraýǵa sý tasqynyna baılanysty Grýzııanyń Borjomı qalasynan gýmanıtarlyq kómek keldi.
Oblystyq jedel shtabtyń málimetinshe, Borjomı qalasynyń mýnıtsıpalıteti Atyraýǵa «Borjomı» mıneraldy sýynyń 3 myń bótelkesin gýmanıtarlyq kómek retinde jibergen.
«Ótken jyldyń qyrkúıek aıynda Borjomı men Atyraý qalalary arasynda baýyrlastyq baılanys ornatylǵan edi. Bıylǵy sý tasqynyna baılanysty Borjomı mýnıtsıpalıteti Atyraýǵa gýmanıtarlyq kómek kórsetýge sheshim qabyldaǵan», - dep habarlady jedel shtabtan.
Atyraýda Grýzııa Respýblıkasy kapıtalynyń qatysýymen 16 kásiporyn tirkelgen. Grýzııamen syrtqy saýda aınalymy byltyrǵy qańtar-mamyrda 396,9 myń AQSh dollaryna jetken. Munaıly shahardan Kýtaısı baǵytyna aptasyna 3 áýe reısi qatynaıdy. Aldyńǵy jyly Atyraý oblysynan Grýzııaǵa demalý úshin 18 myńnan astam týrıst barǵan.
Eske sala ketelik, buǵan deıin byltyrǵy tórt aıda 10 myńǵa jýyq atyraýlyq Grýzııaǵa saıahattaǵanyn jazǵan edik.
