Atyraýdyń Jylyoı aýdanynan evakýatsııalanǵan halyq sany 31 myńnan asty
ATYRAÝ. KAZINFORM – Atyraý oblysyndaǵy Jylyoı aýdanynan qaýipsiz aımaqqa evakýatsııalanǵan turǵyndar sany 31 myńnan asty.
Atyraý oblysynyń jedel shtabynan málim etkendeı, Jylyoı aýdanynyń sý basqan eldi mekenderinen turǵyndardy evakýatsııalaý jalǵasyp jatyr.
«Jylyoı aýdanynan 5 sáýirden beri 31 009 adam evakýatsııalandy. Onyń ishinde Mańǵystaý oblysyna 20821 adam kóshirildi. Al, Teńiz ken ornyndaǵy vahtalyq kentte daıyndalǵan jataqhanalarǵa 7445 adam ornalastyryldy. Atyraý qalasyna 2743 adam keldi» dep habarlady oblystyq jedel shtabtan.
Sondaı-aq, 274 adamnyń keıbiri ýaqytsha evakýatsııalyq pýnkterge, keıbiri týysqandarynyń úıine barýǵa sheshim qabyldaǵan.
Eske sala ketelik, budan buryn Atyraý oblysynda tótenshe jaǵdaı jarııalanǵanyn jazǵan edik.
Sondaı-aq, Atyraý oblysynyń ákimi Serik Shápkenov turǵyndar ómirine qaýip tónse, aldyn ala habarlanatynyn aıtty.
Keıin Jaıyq ózeniniń sýy Atyraý qalasyna qaı tustan kirýi múmkin ekenin habarlaǵan bolatynbyz.
