Atyraýdyń tusynda Jaıyq ózeniniń sýy ekinshi kún qatarynan kóterilgen joq

ATYRAÝ. KAZINFORM – Atyraý qalasynda Jaıyq ózeniniń sýy ekinshi kún qatarynan kóterilgen joq.

Atyraý oblysy jedel shtabynyń deregine qaraǵanda, 28 mamyrda Jaıyq ózenindegi sý deńgeıi munaıly shahar tusynda +2 snatımetrge kóterilip, 6 metrge jetken edi. 

Sodan beri Atyraý qalasynda gıdrobekette osy deńgeı saqtalyp tur. Biraq, bul – qaýipti shekten 50 santımetrge artyq. 

Atyraý qalasy ákiminiń orynbasary Nurjan Ermuhanovtyń aıtýynsha, Jaıyq ózeniniń jaǵalaýyndaǵy qaýipti aýmaqtar áli de baqylaýǵa alynyp otyr. 

«Sý basý qaýpi bar Qaıyrshaqty, Erkinqala, Almaly aýyldyq okrýgterinde kúni-túni kezekshilik uıymdastyryldy. Qazir atalǵan aýyldyq okrýgterge sý tasqynyna qarsy jumystarǵa 350 tehnıka tartyldy. Onyń ishinde 70 tehnıka Sokolok kanaly boıyndaǵy bógetti bekitý jumysyna jiberildi», - deıdi Nurjan Ermuhanov. 

Jaıyq ózenindegi sý Inder men Mahambet aýdanynda áli shekti deńgeıden asyp tur. Biraq, Inder aýdanynda kún saıyn tómendep jatyr. Búgin aýdan ortalyǵy – Inderbor kentiniń tusynnda -1 santımetrge tómendedi. Qazir bul aýdandaǵy sý deńgeıi – 9 metr 53 santımetr.

Mahambet aýdanynda da ózen arnasynyń sýy tómendeı bastady. Búgin kúndizgi saǵat 12:00-de Mahambet aýylynda 10 metr 16 santımetr boldy. 

Eske sala ketelik, budan buryn Jaıyq sýy Atyraýda 6 metrge jetkenin jazǵan edik.