Atyraýdyń Reseımen shekarasyndaǵy Bókeıhan aýylynda órt sóndirý deposy ashyldy
ATYRAÝ. KAZINFORM – Atyraý oblysynda Reseı Federatsııasymen shekaradaǵy Bókeıhan aýylynda órt sóndirý deposy iske qosyldy.
Eki el shekarasyndaǵy bul aýyl Qurmanǵazy aýdanyndaǵy Qıǵash ózeniniń jaǵalaýynda ornalasqan. Sý arnasynyń arǵy betinde Reseıdegi Astrahan oblysynyń aýyldary bar.
Tótenshe jaǵdaılar mınıstri Shyńǵys Árinovtiń aıtýynsha, bul nysan Memleket basshysynyń azamattyq qorǵaý júıesin nyǵaıtý, óńirlerdegi qaýipsizdik deńgeıin arttyrý jónindegi tapsyrmasyna sáıkes iske asyrylǵan.
— Bizdiń maqsatymyz — kez kelgen tótenshe jaǵdaıǵa daıyn bolý, jedel áreket etý. Ásirese, eń shalǵaıdaǵy aýdandarda daıyndyq pen jedeldiktiń tıimdiligin arttyrý úshin bólimshelerdi zaýmanaýı nysandarmen, jańa tehnıkalarmen qatýdy qolǵa aldyq. Bul tótenshe jaǵdaıdyń aldyn alýǵa, zardabyn tez joıýǵa múmkindik beredi, — dedi Shyńǵys Árinov.
Atyraý oblysynyń ákimi Serik Shápkenovtiń deregine súıensek, aýyldardaǵy órtke qarsy ınfraqurylymdy nyǵaıtý jalǵasyn tabady.
— Shalǵaı aýyldardaǵy órt sóndirý depolary zaman talabyna saı jaraqtandyrylyp jatyr. Órt sóndirýshiler daıarlyǵy men alańsyz jumys isteýine tolyqqandy jaǵdaı jasaldy. Munyń bári tótenshe jaǵdaı kezinde shuǵyl áreket etýge, kásibı turǵyda shyńdalýǵa, azamattardyń qaýipsizdigin qamtamasyz etýge yqpal etedi. Biz sala mamandarynyń áleýmettik jaǵdaıyn jaqsartýǵa nazar aýdaryp otyrmyz, — dedi Serik Shápkenov.
Oblys ákiminiń málimetinshe, órt sóndirý deposynyń nysany jergilikti bıýdjet esebinen salynǵan. Onyń qurylysyn merdiger mekeme — «Dekor» JShS júrgizgen.
Depo ǵımaratynyń jalpy aýmaǵy — 480 sharshy metr. Órt sóndirý deposy tez qurastyrylatyn joǵary sapaly modýldi konstrýktsııalardan salynǵan. Ǵımaratta dıspetcherlik jáne demalys, as bólmeleri, oqý synyby jaıýdyqtalǵan. Eki órt sóndirý tehnıkasyna arnaǵan jabyq turaq bar.
Tótenshe jaǵdaılar mınıstri Shyńǵys Árinov jergilikti órt sóndirýshilerge 27 jańa tehnıkany tapsyrdy. Onyń 22-si — túrli syıymdylyqtaǵy tsısterna bar órt sóndirý tehnıkasy.
Sondaı-aq, tótenshe jaǵdaılardyń saldaryn joıýǵa arnalǵan jabdyqtarmen qamtylǵan ASA-20 apattyq-qutqarý, baılanys jáne jaryqtandyrý, janarmaımen jabdyqtaıtyn, bıik ǵımarattardaǵy órtti sóndirýge arnalǵan mehanıkalyq satysy ornatylǵan ATsL-30, manıpýlıator-evakýator, AKP-70 VEMA avtokótergish, ASO-20, Trackol Vega-409 tehnıkalary bar.
Eske sala ketelik, buǵan deıin Atyraý oblysyna tótenshe jaǵdaı kezinde qoldanylatyn L-410 ushaǵy jetkizilgenin jazǵan edik.