Atyraýdyń medıtsına salasynda jemqorlyq táýekeliniń 13 deregi anyqtalǵan
ATYRAÝ. KAZINFORM – Atyraý oblysynyń medıtsına salasynda sybaılas jemqorlyq táýekeliniń 13 deregi anyqtalyp otyr. Osyǵan baılanysty berilgen 21 usynystyń 12-si ǵana oryndalǵan.
Sybaılas jemqorlyqqa qarsy is-qımyl agenttigi Atyraý oblystyq departamentiniń málimetinshe, densaýlyq saqtaý salasyndaǵy sybaılas jemqorlyq táýekelderin joıý jónindegi jospardyń oryndalýyna taldaý júrgizilgen.
«Departament qyzmetkerleri júrgizgen taldaý qorytyndysymen densaýlyq saqtaý salasynda sybaılas jemqorlyq táýekeliniń 13 deregi anyqtaldy. Onyń ishinde oryndalmaǵan jumys úshin «Áleýmettik medıtsınalyq saqtandyrý» qorynan qarajat aýdarý, múddeler qaqtyǵysy, kommertsııalyq qyzmet kórsetý kezinde úshinshi tulǵalardyń múddesin qoldaý táýekeli sekildi derekter bar. Osyǵan oraı departament kemshilikterdijoıý boıynsha jospar ázirlep, 21 usynys engizdi. Osy kezge deıin usynystyń 12-si oryndaldy» dep habarlady óńirlik departamentten.
Oblystyq qoǵamdyq keńestiń sybaılas jemqorlyqqa qarsy is-qımyl jónindegi komıssııasynyń músheleri medıtsına mekemeleriniń keıbir qyzmetkerleri jurtshylyq tarapynan renish týdyratyn, densaýlyq saqtaý salasynyń bedeline nuqsan keltiretin teris qylyqtar jasaıtynyn joqqa shyǵarmaıdy.
Máselen, komıssııa múshesi Saltanat Rahımovanyń aıtýynsha, taldaý densaýlyq saqtaý salasynda joıýdy qajet etetin júıeli sybaılas jemqorlyq táýekelderiniń bar ekenin kórsetken.
Eske sala ketelik, budan buryn Atyraý oblysynda aýdandyq ákimdikterdiń bólim basshylary zańsyz áreketke barǵanyn jazǵan edik.
