Atyraýdyń mańynan dendrologııalyq park salýǵa 20 gektar jer telimi bólingen

ATYRAÝ. KAZINFORM – Atyraý qalasynyń mańynan dendrologııalyq park salýǵa 20 gektar jer telimi bólingen.

Atyraý oblysy ákiminiń orynbasary Jasulan Bısembıevtiń aıtýynsha, Ekologııa jáne tabıǵı resýrstar mınıstrliginiń kelisimi alynsa, jobalaý jumysy bastalady. 

«Kópten beri aınalysyp júrgen birqatar jobalarymyzben bóliskim keledi. Birinshisi – Atyraý qalasynda dendrologııalyq park ashý jobasy. 2023 jyly Atyraý qalasy mańynan 20 gektardan astam jer telimin bólip, ǵylymı negizdeme jasaý jumystaryn bastaǵan edik. Búginge deıin Botanıka jáne fıtoındýstrııa ınstıtýty jańa parktiń ǵylymı negizdemesin ázirledi. Endigi kezekte Ekologııa jáne tabıǵı resýrstar mınıstrliginen tıisti kelisim alyp, jobalaý jumystaryna kirisý qajet. Barlyq qujatty rásimdegen soń, qurylysqa kirisetin bolamyz», -deıdi Jasulan Bısembıev.

Ákim orynbasarynyń aıtýyna qaraǵanda, ekinshi joba – qazaq ádebıetin, sonyń ishinde jergilikti jazýshylarymyzdyń týyndylaryn aýdıo nusqaǵa aýdaryp, tanymal platformalarǵa júkteý. 

«Osyǵan baılanysty Bookmate qosymshasymen kelisimge kelip, alǵashqy 4 kitaptyń aýdıo nusqalaryn jasaldy. Aýdıo nuqsalar qosymshaǵa júkteldi. Aldaǵy ýaqytta taǵy 30-dan astam kitapty engizetin bolamyz. Bul bastamalar – ákimdiktiń júzege asyryp kele jatqan kóptegen jobalarynyń biregeıi. Jobalar belsendi azamattardyń usynystarymen bastaldy. Olardyń sátti júzege asýy qoǵamnyń nazarynda bolady», -dep málim etti Jasulan Bısembıev.

Eske sala ketelik, buǵan deıin ortaǵasyrlyq Saraıshyqtan tabylǵan keseniń qandaı qupııasy baryn jazǵan edik.