Atyraýdyń Mahambet aýdanynda Jaıyq jaǵalaýy betonmen nyǵaıtylyp jatyr
ATYRAÝ. KAZINFORM – Atyraý oblysynyń Mahambet aýdanynda Jaıyq ózeniniń jaǵalaýy betonmen nyǵaıtylyp jatyr. Munaıly shahar mańyndaǵy aýyldar qosymsha bóget salý qolǵa alynǵan.
Mahambet aýdandyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń bas mamany Erlan Jumashevtyń aıtýynsha, Jaıyq ózeniniń jaǵalaýynda 17 eldi meken ornalasqan. Jaǵalaýdaǵy bógettiń jalpy uzyndyǵy 116 shaqyrymdy quraıdy.
– Qazir Mahambet jáne Alǵa aýylynda Jaıyq ózeniniń jaǵalaýyn bekitý jumystary júrgizilip jatyr. Jaǵalaýǵa arnaıy beton blok qoıylyp, qıyrshyq tas pen gıdrooqshaýlaǵysh materıal tóseldi. Ózendegi sý deńgeıin baqylaý úshin qosymsha ınjenerlik qurylymdar ornatyldy. Mahambet aýylynda bul jumystyń 65, Alǵa aýylynda 30 paıyzy oryndaldy. Aýdan ákimdigi jobanyń iske asyrylýy men qurylys jumystarynyń sapaly júrgizilýin qadaǵalaýǵa aldy, -dep habarlady Erlan Jumashev.
Onyń pikirinshe, qıyrshyq tasty tóseý ádisi sý erozııasyna tózimdilikti arttyrady. Sondaı-aq jaǵalaýdyń turaqtylyǵyn qamtamasyz etedi.
– Topyraqty nyǵaıtý úshin tas tóselgen soń jaǵalaýdy abattandyrý jáne kógaldandyrý sharalaryn qolǵa alýdy josparlap otyrmyz. Jumys barysynda turyǵyndarǵa zııansyz, ekologııalyq qaýipsiz ádisterdi paıdalanýdamyz, -deıdi Erlan Jumashev.
Onyń deregine qaraǵanda, Jaıyq ózeniniń Mahambet, Baqsaı, Saraıshyq, Beıbarys, Esbol, Aqtoǵaı aýyldaryndaǵy jaǵalaýynda 28 shaqyrym bóget nyǵaıtylǵan. Endi jańadan 8 shaqyrymdyq tosqaýyl salynyp jatyr. Osy kezge deıin 20 shaqyrym jaǵalaýda jumys tolyǵymen aıaqtalǵan. Oǵan 20 adam men 18 tehnıka tartylǵan.
Eske sala ketelik, budan buryn tasqyn qarsańynda Atyraýda kanaldar arshylyp, bóget salynyp jatqanyn habarlaǵan edik.