Atyraýdyń Mahambet aýdanynda Jaıyq ózeniniń deńgeıi 8 metrden asty

ATYRAÝ. KAZINFORM – Atyraý oblysynda Jaıyq ózeni taǵy kóterildi. Qazir Mahambet aýdanynda sý aıdynynyń deńgeıi 8 metrden asty.

Atyraý oblysynyń jedel shtaby búgin tańerteńgi saǵat 08:00–den beri Jaıyq ózenindegi sý deńgeıi týraly málimet usyndy. 

Máselen, Inder aýdanynda tańertennen bergi 12 saǵatta sý deńgeıi +19 santımetrge kóterilgen.

Osylaısha keshki saǵat 20:00–de aýdan ortalyǵy — Inderbor kentinde 769 santımetrge jetken. 

Al, Mahambet aýdanynda ózen arnasy +8 santımetrge ulǵaıǵan.

Keshki saǵat 20:00–de osy aýdandaǵy Mahambet aýylynyń tusynda Jaıyq ózeniniń sýy 8 metr 3 santımetr bolyp tur. 

Jaıyq deńgeıi Atyraý qalasynda da kóterildi.

Tańerteńgi deńgeıden +7 santımetrge kóterilip, keshki saǵat 20:00–de 466 santımetr boldy. 

Eske sala ketelik, Atyraý oblysynyń Mahambet aýdanynda Jaıyq deńgeıi 795 santımetrge jetkenin habarlaǵan bolatynbyz. 

Sondaı-aq, Atyraý oblysynda sý tasqynyna daıyndyq qalaı júrgizilgeni týraly jazǵan edik.