Atyraýdyń Mahambet aýdanynda Jaıyq ózeniniń deńgeıi 7 metrden asty
ATYRAÝ. KAZINFORM – Atyraý oblysynda Jaıyq ózenindegi sý deńgeıi kún saıyn kóterilip keledi. Búgin Mahambet aýdanynda 7 metr 28 santımetrge jetti.
«Qazgıdromet» RMK Atyraý oblystyq fılıalynyń gıdrologııalyq monıtorıng derekterine súıensek, ózen deńgeıi Batys Qazaqstan oblysynyń aýmaǵynan keletin sý esebinen ózgeredi.
Máselen, búgin, 26 sáýirde saǵat 08:00-de Inderbor kentindegi gıdrobekette Jaıyq ózenindegi sý deńgeıi +9 santımetrge kóterilip, 613 sm bolǵan. Inder aýdanynda sý tasqyny bastalǵaly beri ózen deńgeıi 390 santımetrge kóterilgeni anyqtalǵan.
Al Mahambet aýylyndaǵy bekette sý deńgeıi 728 santımetrge jetip otyr. Munda sý bir táýlikte +7 sm kóterilgen. Jalpy kóterilý deńgeıi – 411 santımetr.
Jaıyq ózeniniń deńgeıiniń kóterilgeni Atyraý qalasyndaǵy gıdrobekette de baıqalady. Bul bekette sý aıdyny +3 santımetrge kóterilip, 428 santımetr boldy. Shahar aýmaǵynda sý tasqyny bastalǵan kezden bergi kóterilý kórsetkishi 237 santımetrge jetken.
Eske sala ketelik, budan buryn Atyraýǵa tasqyn sýdyń kóp bóligi mamyr aıynyń basynda kelýi múmkin ekenin habarlaǵan edik.
Sondaı-aq, Jaıyq ózeninen Atyraý mańyndaǵy Sokolok kanalyna sý kele bastaǵanyn jazǵan bolatynbyz.
Al, balyqshylar Jaıyq ózenine mol sý kelse, balyq qorynyń kóbeıýine yqpal etetinine úmittenedi.
