Atyraýdyń Mahambet aýdanynda 16 balabaqshanyń jumysy onlaınǵa kóshirildi

ATYRAÝ. KAZINFORM – Búgin Atyraý oblysynyń Mahambet aýdanyndaǵy balabaqshalar jumysy onlaınǵa kóshirildi. Buǵan Jaıyq ózenindegi sý deńgeıiniń qaýipti shekten asqany sebep bolyp otyr.

Mahambet aýdany ákimdiginiń aqparatyna súıensek, munda 9 okrýgtegi 21 eldi mekende 30940 adam turady. Onyń ishinde Jaıyq ózenine jaqyn ornalasqan 17 aýyldyń mańynda 105 shaqyrym bóget salynǵan.

Bul aýdanda 10 sáýirden beri 15 mektepte dáris alatyn 6288 oqýshy sabaqty onlaın oqyp júr. Qazir aýdanda 22 evakýatsııalyq pýnkt ashylyp, sý basý qaýpi tónse, turǵyndardy qabyldaýǵa daıyn tur. Qaýipsiz aýmaqqa 5400 tórt túlik shyǵarylǵan. Al búgin, 6 mamyrda aýdandaǵy 16 balabaqsha onlaın formatpen jumys isteýge kóshirildi. Balabaqshalarda 1627 bala mektepke deıingi tárbıe alady. Mahambet aýdandyq bilim bóliminiń basshysy Venera Qabyshevanyń deregine súıensek, 22 evakýatsııalyq pýnkt daıyndalǵan.

«Eldi mekenderdi sý basý qaýpi týyndasa, turǵyndardy tasymaldaýǵa 24 avtobýs pen GAZel bólindi. Buǵan qosymsha jeńil kólikter de tasymal jumysyna qosylatyn bolady. Bul kóliktermen bir mezgilde 200 adam tasymaldanady. Kólikterdiń qozǵalys marshrýttary anyqtaldy», - dep habarlady Venera Qabysheva.

Eske sala ketelik, budan buryn Atyraýdyń Mahambet aýdanynda 6 myńnan astam oqýshy sabaqty onlaın oqıtynyn jazǵan bolatynbyz.