Atyraýdyń Qyzylqoǵa aýdanynda birneshe aýyldyń turǵyndary qaıyqpen qatynaıdy

ATYRAÝ. KAZINFORM – Atyraý oblysynyń Qyzylqoǵa aýdanynda birneshe aýyldyń turǵyndary úshin kólik qatynasy toqtady. Turǵyndardyń aýdan ortalyǵymen qatynasy úshin eki qaıyq bólingen.

Qyzylqoǵa aýdany ákimdiginiń baspasóz qyzmetinen málim etkendeı, tasqyn sýdyń saldarynan aýdan ortalyǵy – Mııaly aýylynan 500 metr qashyqtyqtan ótetin «Saǵyz-Mııaly-Qarabaý-Inder» baǵytyndaǵy aınalma tusy jyrylyp, avtokólik qatynasy tolyqtaı toqtaǵan. 

«Qazir Oıyl ózeniniń aýdan aýmaǵyndaǵy jaǵadaýyna jaqyn ornalasqan okrýg turǵyndary úshin 2 qaıyqpen tasymal uıymdastyrylýda. Oıyl ózeni arnasynan asyp aǵyp jatyr. Sýdyń qazirgi deńgeıi – 3,2 metr. Oıyldyń sýy «Eraly» sý torabyna quıylyp jatyr. Al, Saǵyz ózenindegi sý deńgeıi túsip, qaýip seıildi», - dep habarlady ákimdiktiń baspasóz qyzmeti.

Atyraý oblystyq tótenshe jaǵdaılar departamentinen 4 sýdan qutqarý jasaǵy, 25 qutqarýshy Qyzylqoǵa aýdanyna kómekke keldi. Sondaı-aq, jol talǵamaıtyn 1 Trekol, 1 Ýral, 1 ÝAZ kóligi men 3 matorly qaıyq jetkizildi.

«Aýdan aýmaǵynda 45,7 shaqyrymdyq bóget bar. Byltyrǵy kóktemnen beri 3 bóget, 1 ótkel qalpyna keltirildi. Qarabaý, Taısoıǵan, Oıyl, Kózdiǵara jáne Saǵyz aýyldyq okrýgterinde 16 shaqyrym bóget jańadan soǵyldy», - dep málim etti ákimdiktiń baspasóz qyzmetinen.

Eske sala ketelik, budan buryn Atyraý oblysynyń qansha eldi mekenine tasqyn sý qaýpi tónetinin habarlaǵan edik.

Keıin Atyraý oblysynda sý tasqynyna baılanysty 190-nan astam qabyldaý beketi daıyndalǵanyn jazǵan bolatynbyz. 

Sondaı-aq, Atyraý oblysyndaǵy sý basý qaýpi bar aýmaqtar men joldaǵy sý ótkizetin qubyr men kópirler tekserildi.