Atyraýdyń Qyzylqoǵa aýdanynda 2 ózenniń jaǵalaýyndaǵy bóget bıiktetilip jatyr

ATYRAÝ. KAZINFORM – Atyraý oblysynyń Qyzylqoǵa aýdanynda Oıyl ózeniniń jaǵalaýyndaǵy bógetti nyǵaıtý qolǵa alyndy. Osy kezge deıin 26 shaqyrym bóget bıiktetilgen.

Qyzylqoǵa aýdanynyń ákimi Qanat Ázmuhanovtyń aıtýynsha, byltyr aýyldyq okrýgterge eki ózennen qaýip tóngen. Onyń biri – Oıyl, ekinshisi – Noǵaıty ózeni. 

– Bastaýyn Aqtóbe oblysyndaǵy Muǵaljar taýynan alatyn Oıyl ózeni aýdan terrıtorııasyndaǵy 7 aýyldyq okrýgtiń aýmaǵymen aǵyp ótedi. Biraz jyl buryn ózen sýy tartylyp, ekologııalyq apat aldynda turdy. Al sońǵy úsh jylda Oıyl ózeni arnasynan asyp, jaǵalaýdaǵy aýyldarǵa qaýip tóndirdi. Tabıǵı sıpattaǵy apattyń aldyn alý maqsatynda aýdandyq arnaıy shtab qurylyp, tasqynǵa qarsy tosqaýyl bolar qaýipsizdik sharalary atqaryldy. Bıyl selge qarsy daıyndyq sharalary erte bastaldy. Qazir Oıyl ózeniniń boıynda ornalasqan aýyldyq okrýgter aýmaǵyndaǵy qaýipti ýchaskelerde bógetterdi nyǵaıtý jáne bıiktetý qolǵa alyndy, -deıdi Qanat Ázmuhanov. 

Aýdan ákiminiń deregine qaraǵanda, 9 aýyldyq okrýgtiń teńgerimindegi uzyndyǵy 41,2 shaqyrym bóget bar. Qazir Mııaly, Jangeldın, Kózdiǵara, Taısoıǵan aýyldyq okrýgterinde bógettiń osal tusyn bıiktetý bastalǵan. 

– Oıyl ózeniniń Tasshaǵyl, Jambyl, Qyzylqoǵa aýyldyq okrýgterinde jaǵalaýyndaǵy bógetti nyǵaıtý maqsatyndaǵy bıiktetý jumysy tolyq aıaqtaldy. Endi Oıyl aýyldyq okrýgindegi osyndaı jumys bastalady, -deıdi Qanat Ázmuhanov. 

Onyń málimetinshe, osy kezge deıin eki ózen jaǵalaýynda 26,5 shaqyrym bóget bıiktetilgen. 

– Sońǵy jyldary Noǵaıty ózeninen Saǵyz aýyldyq okrýgine birneshe ret qaýip tóndi. Osyǵan baılanysty atalǵan ózenniń jaǵalaýyn bıiktetip, arnasyn qumnan tazalaýǵa sheshim qabyldanǵan edi. Qazir atalǵan sý arnasy keńeıtilip, 2 shaqyrym bógetti nyǵaıtý jumysy aıaqtaldy, -dep málim etti Qanat Ázmuhanov. 

Eske sala ketelik, budan buryn Atyraýdyń Mahambet aýdanynda Jaıyq jaǵalaýy betonmen nyǵaıtylyp jatqanyn jazǵan edik.