Atyraýdyń Isataı aýdanynda oqýshylar sabaqty qashyqtan oqıdy

ATYRAÝ. KAZINFORM – Atyraý oblysynyń Isataı aýdanynda oqýshylar sabaqty onlaın oqýǵa jiberildi.

Isataı aýdandyq bilim bóliminiń basshysy Gúlaına Qurmanǵalıevanyń aıtýynsha, tótenshe jaǵdaıǵa baılanysty oqýshylar onlaın rejımde bilim alady. 

«Óńirdegi tabıǵı sıpattaǵy tótenshe jaǵdaıǵa oraı oqý protsesi onlaın formatqa kóshirildi. Oqýshylardy onlaın oqytýǵa Daryn.online, Amansultan platformalary qoldanylady. Osyǵan baılanysty aǵymdaǵy baqylaýlar men synaqtar ótkizý toqtatyldy», - deıdi Gúlaına Qurmanǵalıeva.

Onyń deregine súıensek, bul aýdandaǵy 16 mektepte 5229 oqýshy bilim alady. Oqýshylarǵa 802 pedogog dáris beredi.

Eske sala ketelik, budan buryn Atyraý oblysynda 149 myń oqýshy jıyntyq baǵalaýdan bosatylǵanyn habarlaǵan edik.