Atyraýdyń Inder aýdanynda Jaıyq jaǵalaýyndaǵy 9 bóget nyǵaıtylyp jatyr
ATYRAÝ. KAZINFORM – Atyraý oblysynyń Inder aýdanynda Jaıyq ózeniniń jaǵasyndaǵy 9 bógetti qosymsha nyǵaıtý júrip jatyr. Bógettiń uzyndyǵy – 34,5 shaqyrym.
Inder aýdandyq turǵyn úı-kommýnaldyq sharýashylyq, jolaýshylar kóligi, avtomobıl joldary jáne turǵyn úı ınspektsııasy bóliminiń basshysy Shapaǵat Ǵabbasovtyń málimetinshe, bógetti bıiktetý jumysyna 25 adam tartylǵan. Bul iske 18 tehnıka bólingen.
– Aýdan ortalyǵy – Inderbor kenti men Eltaı aýyldyq okrýgindegi bógetterdi qaıta jańǵyrtý jumystary aıaqtaldy. Al Bódene jáne Yntymaq aýylynda dál osyndaı jumys júrgizilip jatyr. Jarsýat, Órlik, Esbol, Kóktoǵaı, Qurylys aýyldaryndaǵy bógetti bıiktetý, osal tusyn qosymsha nyǵaıtý úshin merdigermen kelisimshartqa jasaý sharasy qolǵa alyndy, - dep habarlady Shapaǵat Ǵabbasov.
Onyń deregine qaraǵanda, Atyraý-Oral respýblıkalyq mańyzy bar trassadan Inderbor kentine baratyn 7 shaqyrym joldy jóndeý jumysy áli tolyq bitpegen. Osy kezge deıin atalǵan joldy jóndeý 90 paıyzǵa aıaqtalǵan.
– Inderbor kentine deıingi jolda tórt mal ótkeli salyndy. Qosymsha bir sýaǵar qubyry júrgizildi. Qurylys jumystaryn bıyl sáýir aıynda aıaqtaý josparlanyp otyr, - dep málim etti Shapaǵat Ǵabbasov.
Eske sala ketelik, budan buryn Atyraý oblysynda 51 eldi mekendi tasqyn sý basý qaýpi baryn habarlaǵan bolatynbyz.
