Atyraýdyń Inder aýdanynda 80 otbasy jańa páterge ıe boldy

ATYRAÝ. KAZINFORM – Atyraýdyń Inder aýdanynda 80 otbasyna jańa páter berildi. 

Inder aýdanynyń ákimi Serik Nysanbaevtyń aıtýynsha, turǵyn úı kezeginde 1400-den astam adam tur.

– Prezıdent tapsyrmasyna sáıkes aýdan turǵyndarynyń ómir súrý sapasyn jaqsartý úshin jyl saıyn turǵyn úımen qamtý jalǵasyp keledi. Máselen, 2023 jyly 192 páter, Jarsýat aýyldyq okrýginde 10 turǵyn úı paıdalanýǵa berildi. Buǵan qosa kópqabatty 13 úıdegi 112 otbasy jańa qonysqa kóshti. Apatty turǵyn úılerdiń turǵyndary da jańa baspanamen qamtyldy, - deıdi Serik Nysanbaev.

Onyń málimetinshe, jańa baspana alǵandardyń arasynda úı kezeginde turǵan kópbalaly 30, áleýmettik turmysy tómen 22 otbasy bar. Sondaı-aq ata-ana qamqorlyǵynan tys qalǵan 8 jasóspirim de jańa qonysqa kóship otyr. Al 10 páter qyzmettik maqsatta, taǵy 10 baspana ıpotekalyq júıemen berilgen.

– Baspanamyzdyń bolǵanyn bárimiz ańsaımyz. Balalarymyz «Jańa páterge qashan kóshemiz?» dep jıi suraıtyn edi. Shyndyǵynda, bul páterdi kópten kútip júr edik. Otbasymyzdyń qýanyshynda shek joq. Ásirese balalardyń qýanǵanyn kórýden artyq baqyt bar ma? - deıdi jańa páterdiń ıesi Aınara Uljabaeva.

Eske sala ketelik, budan buryn Atyraýda Táýelsizdik kúni qarsańynda 73 otbasyna jańa baspana berilgenin jazǵan bolatynbyz.