Atyraýdyń burynǵy ákimi qurǵan kompanııaǵa 897 mln teńge aıyppul salyndy
ATYRAÝ. KAZINFORM – Atyraý oblysynyń burynǵy ákimi Saǵat Túgelbaev qurǵan «ANACO» JShS aýaǵa normadan tys gaz shyǵarǵan. Sot atalǵan kompanııaǵa 897 mln teńge aıyppul salý týraly qaýly shyǵardy.
Atyraý oblystyq ekologııa departamentiniń baspasóz qyzmetinen málim etkendeı, «ANACO» JShS tarapynan atmosferalyq aýaǵa gazdardy zańsyz shyǵarý saldarynan lastaýshy zattardyń shyǵaryndylaryn normatıvten asyrý deregi anyqtalǵan.
– Jylyoı aýdany prokýratýrasynyń zańdylyqtyń buzylýyn joıý týraly usynysy qaraldy. Departament tarapynan «ANACO» JShS-ǵa qatysty QR Ákimshilik quqyq buzýshylyq týraly kodeksiniń 328-babynyń 1-tarmaǵymen ákimshilik quqyq buzýshylyq týraly is qozǵaldy. Іsti qaraý nátıjesimen zańdy tulǵa kináli dep tanylyp, 897 024 322 teńge mólsherinde aıyppul túrindegi ákimshilik jazaǵa tartyldy, -dep habarlady departamenttiń baspasóz qyzmeti.
Alaıda, «ANACO» JShS salynǵan aıyppul kólemimen kelispegen. Sóıtip, Atyraý qalasynyń ákimshilik quqyq buzýshylyqtar jónindegi mamandandyrylǵan sotyna, sodan keıin Atyraý oblystyq sotynyń qylmystyq ister jónindegi sot alqasyna shaǵymdanǵan.
– Atalǵan sottardyń 12 aqpandaǵy jáne 19 naýryzdaǵy qaýlylarymen aıyppul kólemi ózgerissiz qaldyrylyp, zańdy kúshine endi. Qazir aıyppul óndirilý satysynda tur, - dep málim etti departamenttiń baspasóz qyzmetinen.
«ANACO» JShS 1994 jyldan beri Qyrylmyltyq ken ornynan munaı óndiredi. Ken orny Jylyoı aýdanynda ornalasqan. Al kompanııany Saǵat Túgelbaev qurǵan. Ol 1992-1994 jyldary Atyraý oblysynyń ákimi laýazymyn atqarǵan.
Eske sala ketelik, Atyraý oblysynda 4 aıda 48,6 mln teńgeniń jalaqy bereshegi óndirilgenin habarlaǵan bolatynbyz.