Atyraýdy shańdy daýyl basyp tur, oqýshylar qashyqtan oqýǵa jiberildi

Búgin Atyraýda ekpini kúshti jel soǵyp tur. Qatty jel shańdy daýyldy kóterip jiberdi, dep habarlaıdy Kazinform.

Oblystyq tótenshe jaǵdaılar departamentiniń qoǵammen baılanys toby shańdy daýylǵa baılanysty eskertý jarııalanǵany týraly aqparat taratty.

«Atyraý oblysynyń turǵyndary men qonaqtarynan qaýipsizdik sharalaryn qatań saqtaýdy suraımyz. Ásirese túngi mezgilde, daýylǵa baılanysty eskertý jarııalanǵan kezde uzaq saparǵa shyǵýdan, alys jerge jaıaý barýdan bas tartý qajet. Kólik qozǵalysyna qoıylatyn shekteý men aýa-raıy jaǵdaıy týraly «112» baılanys operatorynan keletin SMS habarlamadaǵy aqparatpen ýaqytyly tanysqan jón. Balalardy qaraýsyz qaldyrmańyzdar», - dep habarlady departamenttiń qoǵammen baılanys toby.

Oblystyq bilim basqarmasy baspasóz qyzmetiniń málimetinshe, búgin, 12 jeltoqsanda Atyraý qalasyndaǵy mektepterdiń ekinshi aýysymdaǵy oqýshylary sabaqty onlaın oqýǵa kóshirildi.

«Aýa raıynyń qolaısyzdyǵyna, jeldiń uıytqýy sekýndyna 30 metr bolýyna baılanysty qala mektepteriniń oqýshylary ekinshi aýysymda onlaın rejıminde oqıdy», -dep habarlady basqarmanyń baspasóz qyzmeti.

Jylyoı aýdanynda da mektepterdiń oqýshylary onlaın oqýǵa jiberilgen. Bul derekti aýdan ákiminiń orynbasary Gúlnafıs Aıshýaqova rastady.

«Jylyoı aýdany boıynsha orta mektepterdegi ekinshi aýysymdaǵy sabaq onlaın rejımde ótedi», -dep habarlady Gúlnafıs Aıshýaqova.

Eske sala ketelik, budan buryn Atyraý mektepterinde birinshi aýysym oqýshylary onlaın oqıtyn bolǵanyn jazǵan edik.