Atyraýdy kúıik ıisi basyp qaldy: Ákimdik túsinikteme berdi

ASTANA. KAZINFORM — Qala turǵyndaryn alańdatqan ıistiń sebebi — «Sasyqsaı» mańyndaǵy órt ekeni anyqtaldy, dep habarlaıdy Atyraý oblysy ákimdiginiń baspasóz qyzmeti.

Óńir basshysynyń tapsyrmasyna sáıkes, Atyraý oblysy ákiminiń orynbasary Qaırat Nurtaevtyń tóraǵalyǵymen qaladaǵy kúıik ıisine sebep bolǵan órt oshaqtaryn anyqtaý jáne joıý jónindegi jedel shtabtyń otyrysy ótti.

— Monıtorıng barysynda órttiń «Sasyqsaı» býlaný alańynyń ar jaǵynda, Atyraý qalasynan 20 shaqyrym jerdegi teńiz jaq bette tutanǵany belgili boldy. Ony aýyzdyqtaýǵa tótenshe jaǵdaılar departamentiniń kúshteri men quraldary jumyldyryldy, — delingen ákimdik taratqan aqparatta.

Aıta keteıik, osyǵan uqsas jaǵdaı maýsym aıynda da boldy. Sol kezde «Aqjaıyq» tabıǵı rezervatyndaǵy qamys órti saldarynan Atyraýdy tútin basqan edi.