Atyraýdy «Aqjaıyq» tabıǵı rezervatyndaǵy qamys órtiniń tútini basty

ATYRAÝ. KAZINFORM – Kesheden beri Atyraý oblysyndaǵy «Aqjaıyq» tabıǵı rezervatynda qamys órti 280 gektar aýmaqty sharpydy. Qazir munaıly shahardy qamys tútini basyp, ystyń ıisi sezilip tur. 

Atyraý oblystyq tótenshe jaǵdaılar departamentiniń ımıdjdik jumys jáne syrtqy kommýnıkatsııalar tobynyń málimetinshe, Damby aýylynan 20 shaqyrym qashyqtyqta qamys janyp jatyr.

— «Aqjaıyq» memlekettik tabıǵı rezervatynyń aýmaǵynda 280 gektar alańda qamys órtendi. Saǵat 11:00–ge deıin 200 gektar aýmaqtaǵy órt ózdiginen óshti. Tótenshe jaǵdaılar departamenti men tabıǵı rezarvat qyzmetkerleri 50 gektar aýmaqtaǵy órtti sóndirdi. Órtten eldi mekenderge qaýip tónip turǵan joq, — dep habarlady departamenttiń ımıdjdik jumys jáne syrtqy kommýnıkatsııalar toby.

Atalǵan órtti sóndirýge baılanysty arnaıy shtab quryldy. Qazir 30 gektar aýmaqtaǵy qamys órtin sóndirý jumysy júrgizilip jatyr.

Eske sala ketelik, budan buryn Atyraýdaǵy «Aqjaıyq» tabıǵı rezervatynyń aýmaǵynda qamys janyp jatqanyn habarlaǵan edik.