Atyraýdan V Dúnıejúzilik kóshpendiler oıyndaryna 3 sportshy qatysady

ATYRAÝ. KAZINFORM – Atyraý oblysynan V Dúnıejúzilik kóshpendiler oıyndaryna 3 sportshy qatysady.

Atyraý oblystyq dene shynyqtyrý, sport jáne týrızmdi damytý basqarmasy basshysynyń mindetin atqarýshy Nurjaýǵan Tóleýovanyń deregine qaraǵanda, atyraýlyq sportshylar respýblıkalyq chempıonatqa qatysyp, úzdik atanǵan. 

«Máselen, Nurjan Sársenǵalıevtyń jasy – 20-da. Ol alysh kúresinen el chempıonatynda baq synap, óz salmaǵynda jeńimpaz atandy. Al, qusbegilikten sport sheberi Arman Qoshqarov ta Qazaqstan chempıonatynyń jeńimpazy bolǵan. Ol biraz jyldan beri saıatshylyqty serik etip keledi. Úshishi sportshy – Marat Beksultan. Onyń da sport sheberi degen ataǵy bar. Ol – dástúrli sadaq atýdan el chempıonaty men birneshe halyqaralyq týrnırde top jarǵan sportshy», -deıdi Nurjaýǵan Tóleýova. 

Onyń aıtýynsha, kóshpendiler oıyndaryna óńirden 3 kıiz úı tigiledi. Kıiz úıdiń birine jergilikti murajaıdyń jádigerleri qoıylady. Al, ekinshi úıde ulttyq salt-dástúr tanystyrylady. Sondaı-aq, úshinshi kıiz úıde aımaq týrızmine qatysty málimetter kópshilik nazaryna usynylady. 

«Atyraý oblysynyń sportshylary budan buryn ótken Dúnıejúzilik kóshpendiler oıyndarynda júldeli oryndardy ıelenip júr. Máselen, 2016 jylǵy ІІ Dúnıejúzilik kóshpendiler oıyndarynda Suńǵat Zakarııaev qazaq kúresinen birinshi, Arman Qalıev ekinshi oryndy ıelengen edi. Al, 2018 jyly ótken ІІІ dúnıejúzilik oıyndarynda Arman Qalıev qyrǵyz kúresinen ekinshi, Abylaı Amandyq túrkimen kúresinen, Qaıypqan Aqjol alysh kúresinen úshinshi júldege ıe boldy», -dep málim etti Nurjaýǵa Tóleýova. 

Eske sala ketelik, buǵan deıin kóshpendiler oıyndarynda álemniń 35 elinen keletin sadaqshylar qazaqstandyq ónimdi paıdalanatyny habarlanǵan edi.