Atyraýdan Reseı shekarasyna deıingi jolda qandaı jyldamdyqpen júrýge bolady
ATYRAÝ. KAZINFORM — Atyraýdan Reseı Federatsııasynyń shekarasyna deıingi joldyń qurylysy aıaqtalýǵa taıaldy. Soǵan baılanysty atalǵan joldyń bir bóliginde kólikpen saǵatyna 100 shaqyrym jyldamdyqpen júrýge ruqsat berildi.
Atyraý oblystyq polıtsııa departamenti patrýldik polıtsııa rotasynyń aǵa ınspektory Aqylbek Hoshaevtyń aıtýynsha, Zıneden jáne Qurmanǵazy aýylynyń aralyǵynda jyldamdyqty shekteıtin jol belgileri alynyp tastalǵan.
«Kólik júrgizýshilerine 7 qarashada respýblıkalyq mańyzy bar «Aqtóbe-Atyraý-Reseı Federatsııasynyń shekarasy» baǵytyndaǵy tas joldyń 778-833 shaqyrymynda saǵatyna 100 shaqyrym jyldamdyqpen júrýge bolady. Bul Qurmanǵazy aýylynan Zıneden aýylyna deıingi aralyqtaǵy 55 shaqyrymdy quraıdy. Joldyń bul bóliginde arnaıy jol belgileri alynyp tastaldy. Endi kólik júrgizýshilerinen jol erejesin qatań saqtaýdy suraımyz», - deıdi Aqylbek Hoshaev.
Qurmanǵazy aýyly — Reseı Federatsııasymen shektesetin Qumanǵazy aýdanynyń ortalyǵy. Bul aýdandaǵy 49 eldi mekende 56 myńnan astam adam turady.
Al, Zıneden — Isataı aýdanyndaǵy aýyl. Bul aýyldyń tusynda jobaǵa engizilgen 3 sanıtarlyq-gıgıenalyq toraptyń biri ashylǵan.
Atalǵan eki aýdannyń aýmaǵymen ótetin «Aqtóbe-Atyraý-Reseı Federatsııasynyń shekarasy» baǵytyndaǵy joldy jóndeý 2019 jyly bastalǵan. Atyraý qalasynan bastalatyn joldyń kórshi el shekarasyna deıingi uzyndyǵy — 277 shaqyrym. Joldyń qurylysyn jyl sońyna deıin aıaqtaý kózdelip otyr.
Eske sala ketelik, buǵan deıin Atyraýdan Reseı shekarasyna deıingi jol qurylysy qalaı júrip jatqanyn jazǵan bolatynbyz.
