Atyraýdan kúzgi maýsymda 600-ge jýyq bozbala áskerge shaqyrylady

ATYRAÝ. KAZINFORM – Atyraýdan kúzgi maýsymda 600-ge jýyq bozbalany áskerge shaqyrý kózdelip otyr. 

Atyraý qalalyq qorǵanys isteri basqarmasynyń bastyǵy Qurmanáli Júnisbekovtiń aıtýynsha, bozbalalardy áskerge shaqyrý 1 qyrkúıekte bastalady.

«Áskerge baratyn jastardyń 100-ge jýyǵy shekara qyzmetine barady. Elimizdegi Qarýly kúshterdiń áskerı bólimderine 250, Ulttyq Ulanǵa 250 bozbalany attandyrý josparlanyp otyr. Eger ásker qataryna shaqyrylǵanǵa deıin nesıe alǵan bolsa, merzimdi áskerı boryshyn óteý kezinde olarǵa 14 aıǵa kredıttik demalys beriledi», - deıdi Qurmanáli Júnisbekov. 

Onyń aıtýyna qaraǵanda, qazir bozbalalar alǵashqy medıtsınalyq komıssııadan ótip jatyr. Komıssııa músherleri olardyń densaýlyǵyn tekseredi. Sondaı-aq, zerdeleý jumysy qolǵa alynǵan.

Al, Atyraý oblystyq qorǵanys isteri departamenti bastyǵynyń tárbıe jáne ıdeologııa jumysy jónindegi orynbasary Rýsan Ánýarovtyń pikirinshe, elimizdiń qorǵanys salasynda tsıfrlyq tehnologııalardy engizý qolǵa alynǵan.

«Bul protsess áskerge shaqyrý jáne áskerı mindettilerdiń esebin tsıfrlyq formatqa kóshirýge múmkindik beredi. Áskerı qyzmetke shaqyrýdy keıinge qaldyrý nemese odan bosatý týraly málimetterdi elektrondyq úkimet portaly arqyly alýǵa bolady», - dep málim etti Rýsan Ánýarov.

Eske sala ketelik, budan buryn Atyraý oblysyna 1 myńnan astam áskerı qyzmetshi kómekke kelgenin jazǵan bolatynbyz.