Atyraýdan Astanaǵa bılet 130 myń teńgeden: Air Astana jaǵdaıdy túsindirdi
ASTANA. KAZINFORM - Air Astana bloger Ashat Nııazovtyń Instagram men Telegram-daǵy jazbasyna túsinik berdi.
Eske sala keteıik, búgin tańerteń jýrnalıst-bloger Ashat Nııazov Atyraýdan jáne Oraldan ushatyn reıske bılet baǵasynyń sharyqtap ketkenine shaǵymdanyp, kompanııanyń jaqynda ǵana sý tasqyny aımaqtaryna bılet qymbattamaıtyny týraly málimdemesi negizsiz ekenin aıtqan edi.
Áýekompanııanyń málimetinshe, shynymen de Atyraýdan ushatyndar úshin bılet quny 40 myń teńgelik arnaıy tarıf engizilgen.
«Degenmen, bul baǵyt boıynsha suranystyń óskenin eskerýińizdi suraımyz. Ókinishke qaraı, reısterde oryn sany shekteýli jáne Atyraýdan jaqyn arada oryndalatyn reısterde ekonom-klastaǵy bıletter satylyp ketti de, satylymda bıznes-klass bıletteri ǵana qaldy. Skrınshotta Atyraý-Astana bıletiniń bıznes-klastaǵy quny kórsetilgen, óıtkeni ekonom-klasta 23 jáne 24 sáýirge bılet qalmaǵan. Saıtymyzda osy baǵyttaǵy bıletterdi ekonom-klasta 25 sáýirden bastap taba alasyzdar» deıdi kompanııanyń baspasóz qyzmetinen.
Buǵan deıin Air Astana toby Atyraýdan Almaty, Astana, Aqtaý, Shymkent qalalaryna 9 sáýir men 18 sáýir aralyǵynda qosymsha 33 reıs uıymdastyrǵan.
Turaqty reıstermen qatar barlyǵy 95 reıs oryndalady.
