Atyraýdan Almatyǵa baratyn 160 jolaýshy Qarabatan stansasyna avtobýspen jetkizildi

ATYRAÝ. KAZINFORM – Búgin Atyraýdan Almatyǵa qalasyna baratyn jolaýshylar poıyzyna 160 adam bılet alǵan. Jolaýshylar temirjoldaǵy apattyń saldarynan Qarabatan stansasyna deıin avtobýspen jetkizildi.

Búgin tańerteń Atyraý qalasynyń mańyndaǵy Teńdik stansasynda kúzetilmeıtin ótkelde júk poıyzy men KamAZ kóligi soqtyǵysqan edi. Sonyń saldarynan teplovoz ben 11 júk vagony relsten shyǵyp ketti. 

«Jolaýshylar tasymaly» AQ baspasóz qyzmetiniń málimetinshe, temirjoldaǵy apattyń saldarynan 6 jolaýshylar poıyzy kesteden keshikti. 

Al Atyraý oblysy ákiminiń baspasóz hatshysy Rýslan Jumaǵazıevtiń málimetinshe, Maqat aýdanyndaǵy Qarabatan stansasynda turǵan jolaýshylar poıyzynyń jolaýshylary Atyraý qalasyna avtobýspen tasymaldandy. Jolaýshylardy tasymaldaý úshin «Aqjaıyq-Avtopark» jáne «Atyraý-Avtopark» JShS-dan 10 avtobýs bólindi. 

Atyraý oblystyq tótenshe jaǵdaılar departamenti ımıdjdik jumys jáne syrtqy kommýnıkatsııalar tobynyń aqparatyna qaraǵanda, munaıly shahardan Almatyǵa qatynaıtyn poıyzǵa deıin tasymaldaý uıymdastyryldy. 

– Atyraýdan Almaty qalasyna deıin qatynaıtyn №41 jolaýshylar poıyzy Maqat aýdanyndaǵy Qarabatan stansasynda tur. Atalǵan poıyzǵa minýge bılet alǵan 160 adam 10 avtobýspen Qarabatan stansasyna deıin tasymaldandy. Jolaýshylar atalǵan stansaǵa deıin jetkizilip, Almatyǵa júretin jolaýshylar poıyzyna otyrǵyzyldy, -dep habarlady departamenttiń ımıdjdik jumys jáne syrtqy kommýnıkatsııalar toby. 

Eske sala ketelik, buǵan deıin Atyraýdaǵy poıyz apatynan zardap shekken 3 mashınıst aýyr jaraqat alǵanyn habarladyq. 

Temirjoldaǵy apattyń saldarynan keshikken jolaýshylar Atyraýǵa avtobýspen tasymaldandy. 

Sondaı-aq Atyraý mańyndaǵy apattyń saldarynan 6 jolaýshylar poıyzy keshigetinin jazǵanbyz.