Atyraýdaǵy joǵalǵan otbasynyń qyzy men balasyn súńgýirler izdep, taba almady

ATYRAÝ. KAZINFORM — Oblystyq tótenshe jaǵdaılar departamentiniń málimetine súıensek, 3,4 jáne 6 qańtar kúni Jangeldın aýylynyń tóńiregi, Shadymantúbek, Besmola jáne Birmol aýmaǵynda 20 shaqyrymdyq radıýsta súńgýirler men sý drondary jumys istegen. Alaıda nátıje bolmaǵan. 

— 6 qańtarda Qarasý dep atalatyn, kólemi shamamen 30-40 metrdeı bolatyn kóldiń asty qaraldy. Muzdyń astyn tesip, súńgýirler túsirý arqyly, sonymen qatar sýasty dronyn paıdalaný arqyly aýmaǵy shamamen 800 metr bolatyn sý asty izdestirý jumystary júrgizildi. Alaıda atalǵan izdestirý jumystary boıynsha esh nátıje bergen joq, — dedi departamenttiń basqarma bastyǵy Jantóre Demeshov.

Departament búginde bul jumystyń toqtaǵanyn habarlady.

Aıta keteıik, joǵalǵan otbasyny izdestirý jumysy ótken jyldyń 25 jeltoqsanynda bastaldy. Óıtkeni olardyń týysynan aryz sol kúni tústi. Osyǵan baılanysty Atyraý oblysynda bir otbasynyń músheleri izdestirilip jatqanyn habarlaǵan edik. 

Sondaı-aq Atyraý oblysy Qyzylqoǵa aýdanynda joǵalǵan turǵyndardyń esepshoty ýaqytsha buǵattalatynyn, sol úıdegi qyz ben kúıeýbalanyń shetel asyp ketkenin jazǵanbyz.

Kóp ótpeı joǵalǵan otbasydaǵy erli-zaıyptynyń denesi saraıdan tabylǵanyn habarladyq. 

Búgin osy oqıǵa boıynsha adam óltirdi degen kúdikke ilingen 29 jastaǵy Mahambet aýdanynyń turǵynyna izdeý jarııalandy.