Atyraýlyq otbasy isi: kúıeý bala ǵana emes, qyz da kúdikke ilindi
ASTANA. KAZINFORM — Іshki ister mınıstriniń orynbasary Sanjar Ádilov Atyraý oblysynda otbasy múshelerin óltirdi degen kúdikke eki adam ilingenin aıtty.
— Keshe ǵana kúdiktiler Indonezııada ustalǵanyn rastaımyn. Qazirgi kezde olardy elge jetkizý máselesi sheshilip jatyr, — dedi Sanjar Ádilov Parlament Májilisinde tilshiler suraǵyna jaýap bere otyryp.
Onyń aıtýynsha, osy is boıynsha tergeý amaldary men tıisti saraptalar jalǵasyp jatyr.
Sonymen qatar mınıstrdiń orynbasary kúdiktilerdiń jasyrynyp júrgen jerin anyqtaý jumystaryna da toqtaldy.
— Halyqaralyq izdestirý jarııalanǵannan keıin Interpol ókilderi men Qazaqstan polıtseıleri birlesip arnaıy topty qurdy. Osy jumystyń nátıjesinde kúdiktiler ustaldy, ıaǵnı áıeli de kúdikti retinde qarastyrylyp otyr, — dedi Sanjar Ádilov.
Eske salsaq, Jangeldın aýylynda turatyn otbasy 2025 jyldyń sońyna belgisiz jaǵdaıda joǵalyp ketken edi.
6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy.
9 qańtarda Atyraý oblysynda otbasy múshelerin óltirdi degen kúdikke ilingen marqumdardyń kúıeý balasy Sultan Sarsemalıev ekeni resmı túrde anyqtaldy.
Sonymen qatar, Atyraýda ata-enesin óltirdi degen kúdikti Indonezııada ustalǵany málim boldy.