Atyraýdaǵy joǵalǵan otbasy: erli-zaıyptynyń denesinen pyshaq izderi anyqtaldy
ATYRAÝ. KAZINFORM — Atyraý oblysy Qyzylqoǵa aýdany Jangeldın aýylynda erli-zaıyptylardy óltirdi degen kúdikke ilingen marqumdardyń kúıeýbalasy Sultan Sarsemalıev halyqaralyq izdeýde.
Polıtsııa onyń áıeli, jábirlenýshi otbasynyń qyzy Aqbaıan Muqanǵalıevany da iz-túzsiz joǵalý deregi boıynsha izdep jatyr.
— Halyqaralyq izdeýdiń baǵyttaryn aıtýǵa bolmaıdy. Sebebi, kúdiktilerge qandaı da bir aqparat jetetin bolsa, tergeý barysyna kedergi kelýi múmkin. Halyqaralyq izdestirý álemniń barlyq elinde júrgiziletinin qaperlerińizge beremiz, — dedi Atyraý oblystyq PD baspasóz hatshysy Meıirim Erdaýlet.
Qylmyskerlerdi ustaýǵa baǵyttalǵan toptar bar. Olar ustalǵan jaǵdaıda jábirlenýshilerdiń týystaryna jáne BAQ-qa habarlanady.
— Jábirlenýshilerdiń telefondary men SIM kartalarynyń Qazaqstannyń ár jerinde qosylǵandyǵy týraly aqparat bar. Polıtsııa olar boıynsha izdestirý jumysyn júrgizdi. Halyq arasynda Meıramgúl Qarabalınanyń denesi tabylǵany jóninde aqparat tarady. Septıkterden de, shuńqyrlardan da tabyldy degen málimet boldy. Munyń barlyǵy — jalǵan. Polıtsııa qazirgi ýaqytta olardyń qala aýmaǵynda sońǵy birneshe aıda júrgen jerlerin tintip, izdep jatyr, — dedi Atyraý oblystyq PD baspasóz hatshysy.
Polıtsııa departamenti Meıramgúl Qarabalınanyń Atyraý qalasynyń ishindegi kameralarǵa túsip qalǵanyn rastady. Alaıda tergeý múddesine baılanysty qaı kameralarǵa túskenin jáne qandaı is-áreketter bolǵanyn jarııalamady.
— Áleýmettik jelide erli-zaıyptylardyń tunshyqtyrǵan nemese denelerine basqasha zaqym keltirgen degen syndy neshe túrli aqparat tarady. Marqumdardyń denelerinde pyshaq izderi bar. Shanshyp tyǵý arqyly dene jaraqaty bolǵan. Polıtsııa múrdelerdi sot-medıtsınalyq saraptamasyna ótkizdi, endi sarapshylardyń naqty jaýaby kelý qajet. Olar jábirlenýshilerge naqty qandaı dene jaraqaty salyndy, ólimge qandaı faktorlar áser etkenin, jáne qaı ýaqytta óltirilgeni týraly qorytyndy jasaıdy, — dedi Meıirim Erdaýlet.
PD resmı ókiliniń málimetine súıensek, beınekameralardy qaraý jáne PD kúshtik qurylymdardyń is-áreketiniń nátıjesinde jábirlenýshilerdiń shottaryndaǵy zeınetaqynyń qaı jerde kimniń shyǵaryp alǵany anyqtalǵan.
Sońǵy málimet boıynsha, 6 qańtardan beri Naýryz Muqanǵalıevtiń telefony óshirilýi. Búginde jábirlenýshilerdiń telefondary men SIM kartalary izdestirilip jatyr.
Eske salsaq, Jangeldın aýylynda turatyn otbasy 2025 jyldyń sońyna belgisiz jaǵdaıda joǵalyp ketken edi.
6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy.
9 qańtarda Atyraý oblysynda otbasy múshelerin óltirdi degen kúdikke ilingen marqumdardyń kúıeý balasy Sultan Sarsemalıev ekeni resmı túrde belgili boldy.
Ázirge sol úıdiń eki balasy, Meıramgúl Qarabalına men Naýryz Muqanǵalıev tabylmady. Іzdestirý jumysy jalǵasyp jatyr.
Osyǵan deıin Atyraý oblysy Qyzylqoǵa aýdanynda joǵalǵan turǵyndardyń esepshoty ýaqytsha buǵattalatynyn, sol úıdegi qyz ben kúıeýbalanyń shetel asyp ketkenin jazǵanbyz.