Atyraýdaǵy jármeńkede 37 kompanııa 522 bos jumys ornyn usyndy
ATYRAÝ. KAZINFORM – Atyraýda bos jumys oryndary jármeńkesi ótti. Jármeńkege 37 kompanııa qatysyp, 522 bos jumys ornyn usyndy.
Atyraý oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysynyń orynbasary Erkebulan Ábilhasymovtyń aıtýynsha, kompanııalarǵa 453 mamandyq boıynsha jumysshylar qajet.
«Byltyr osyndaı 45 jármeńke uıymdastyrylyp, jumyssyz júrgen 5 myńnan asa adam qatysty. Onyń ishinde 2 300 adam jumysqa ornalasty. Bul jármeńkede jumys berýshiler 522 bos jumys ornyn usyndy. Ásirese, qarapaıym mamandyq ıelerine suranys artyp otyr. Máselen, aǵash satyny montajdaýshy, aspaz, as úı qyzmetshisi, kúzetshi, qoımashy, sylaqshy, daıashy, barmen, tazalaýshy, kir jýýshy, túrli baǵyttaǵy operator sekildi mamandardy suraýshy kóp. Al, ınjenerlik pozıtsııa baǵytynda 69 bos jumys orny usynyldy. Onyń ishinde tehnıka qaýipsizdigi ınjeneri, qurylys ınjeneri, ınjener-mehanık, ınjener-elektrık sekildi mamandyqtar bar», - dedi Erkebulan Ábilhasymov.
Onyń málimetinshe, jármeńkege 800 adam qatysqan. Onyń ishinde alımentin ótemegen boryshkerler de bar.
«Kompanııalar aldymen jumys izdeýshilerdiń tájirıbesi men biliktiligine basa mán beredi. Talapqa sáıkes kelgen mamandar test tapsyrýǵa shaqyrylady. Sodan keıin jumysqa qabyldanǵandar týraly málimet basqarmaǵa beriledi», - dep málim etti Erkebulan Ábilhasymov.
Eske sala ketelik, buǵan deıin Atyraý oblysynda jyl basynan beri 5 myńnan astam jas jumys izdegenin jazǵan edik.
