Atyraýdaǵy janarmaı beketindegi jarylys: is apellıatsııalyq sotta qaralyp jatyr
ATYRAÝ. KAZINFORM – Qulsary qalasyndaǵy «Nıet» janar-jaǵarmaı quıý beketinde bolǵan jarylysqa qatysty qylmystyq is apellıatsııalyq sotta qaralyp jatyr. Birinshi satydaǵy sot «Nıet LTD» dırektorynyń kinásiniń dáleldengenin málimdep, ony 3 jyl 6 aıǵa bas bostandyǵynan aıyrǵan edi. Alaıda sottalýshy bul úkimmen kelispeıdi.
Aıyptalýshy men onyń qorǵaýshylary apellıatsııalyq shaǵymynda istiń birinshi satydaǵy sotta negizinen aıyptaý tarapynyń ustanymy negizinde qaralǵanyn alǵa tartty. Sondaı-aq olar jarylys kezinde qaza bolǵan jumysshylardyń da eńbek mindetterin tıisinshe oryndamaǵanyn aıtyp, jaza óteý merzimin azaıtýdy surady.
Al jábirlenýshi tarap bul ýájdi negizsiz dep sanaıdy. Qaza bolǵandardyń balalaryna 1 mlrd teńge moraldyq ótemaqy talap etti. Jábirlenýshi tarap ókili Aqan Habdeshovtyń aıtýynsha, birinshi satydaǵy sotta istiń barlyq mán-jaıy, sonyń ishinde beınejazbalar tolyq zerttelip, sottalýshynyń kinásine quqyqtyq baǵa berilgen.
- Apellıatsııalyq shaǵymdarda qaza bolǵan adamdardyń da jaýapty bolǵany, eńbek mindetterin josyqsyz oryndaǵany kórsetilgen. Alaıda birinshi satydaǵy sotta barlyq mán-jaı men beınejazbalar zerttelip, sottalýshynyń kinásine quqyqtyq baǵa berildi. Eńbek ınspektsııasy júrgizgen tekseris nátıjesinde jumys berýshiniń kinási 100 paıyz ekeni belgili bolǵan edi , – dedi jábirlenýshi taraptyń ókili Aqan Habdeshov.
Tarap ókiliniń sózinshe, birinshi satydaǵy sottyń úkimi shyqqan kezde de jábirlenýshiler bas bostandyǵynan aıyrý jazasyna qatysty qarsylyq bildirmegen, alaıda moraldyq ótemaqy kólemine kóńilderi tolmaǵan.
Sottalǵan mekeme basshysy qaza bolǵandardyń salynyp jatqan úıiniń qurylysyn aıaqtaýǵa kómektesken. Sonymen qatar balalarǵa qajetti zattardyń barlyǵy alynǵanyn aıtty.
Eske salaıyq, oqıǵa byltyr mamyr aıynda Qulsarydaǵy «Nıet» janar-jaǵarmaı quıý beketinde bolǵan. Jarylys saldarynan erli-zaıypty qaza taýyp, olardyń tórt balasy ata-anasyz qalǵan. Balalardyń bireýi kámeletke tolmaǵan.
Tótenshe jaǵdaı kezinde alty kólik órtenip, bir qabatty úsh jáne eki qabatty bir ǵımarat búlingen. Jarylystyń áseri shamamen 400 sharshy metr aýmaqty qamtyǵan.
Maýsymda sot iske núkte qoıyp, aıyptalýshynyń kinási dáleldengenin aıtyp, úkimdi jarııalaǵan edi. Aıyptalýshy QR Qylmystyq kodeksiniń 281 baby 3 bóligi (Jarylys qaýpi bar obektilerde qaýipsizdik qaǵıdalaryn buzý) boıynsha kináli dep tanyldy. Oǵan 3 jyl 6 aı merzimge bas bostandyǵynan aıyrý jazasy taǵaıyndaldy. Sot sheshimine sáıkes, osy jarylys saldarynan kóz jumǵan erli-zaıyptynyń tórt balasynyń árqaısysyna 10 mıllıon teńgeden moraldyq ótemaqy tóleý mindetteldi.
Buǵan deıin oblystyq tótenshe jaǵdaılar departamenti janarmaı beketinde jarylystyń sebebin málimdegen edi.
