Atyraý oblysynda jańa medpýnkt 8 aıdan keıin ǵana jumysyn bastady
KAZINFORM. ATYRAÝ - Atyraý oblysynyń Qurmanǵazy aýdanyna qarasty Kýdrıashov aýylynda ornalasqan feldsherlik-akýsherlik pýnkt 2025 jyldyń aqpan aıynda saltanatty túrde ashylǵanymen tek qazan aıynda jumysyn bastady.
Medıtsınalyq nysannyń resmı ashylý saltanatyna 14 aqpan kúni Densaýlyq saqtaý birinshi vıtse-mınıstri Tımýr Sultanǵazıev pen oblystyq densaýlyq saqtaý basqarmasynyń basshysy qatysqan. Alaıda kóp uzamaı jabylyp qalǵan. Oǵan ǵımarattyń ınjenerlik jelilerge tolyq qosylmaýy sebep bolǵan.
Oblystyq qurylys, sáýlet jáne qala qurylysy basqarmasynyń bas mamany Ernar Qadirbaıdyń aıtýynsha, nysannyń ǵımaraty men ınjenerlik ınfraqurylymynyń jobasy bólek daıyndalǵan. Bul jumystardyń bir-birimen úılespeýine, ıaǵnı jeliler keıin júrgizilgen.
— Saltanatty ashylý rásimi ótken. Alaıda Qurmanǵazy aýdanynda sý ýaqytpen beriledi. Negizgi qubyrda sý bolmaǵandyqtan, pýnktke sý keste boıynsha jiberildi. Sonymen qatar, jylý qazandarynan aqaý shyqty. Ǵımaratty elektr kózimen qamtý úshin jasalatyn kelisimshart ta ýaqytyly jasalmaǵan. Qazirgi ýaqytta barlyq másele sheshildi, — dedi Ernar Qadirbaı.
Bul nysanǵa 150 mıllıon teńge qarajat jumsalǵan. Degenmen, turǵyndardy qabyldaýǵa tolyq daıyn emes mekemeniń saltanatty túrde ashylýy qoǵamda kóptegen suraq týǵyzdy. «Bul shara kim úshin ótkizildi?» degen saýalǵa oblystyq densaýlyq saqtaý basqarmasy tarapynan naqty jaýap bolmady.
— Atalǵan medıtsınalyq nysandy halyqqa medıtsınalyq kómekti jaqsartý úshin paıdalanýǵa berý maqsatynda onyń resmı ashylýy ótken. Alaıda keıin nysanda birqatar tehnıkalyq jáne ınjenerlik talapqa sáıkes kelmeıtin aqaý anyqtalyp, sonyń saldarynan medıtsınalyq pýnktiniń qyzmeti ýaqytsha toqtatyldy. Atyraý oblysy Densaýlyq saqtaý basqarmasy tarapynan bul máselege beıjaı qaraý bolmaǵanyn atap ótemiz. Merdiger uıymǵa qurylys barysynda anyqtalǵan kemshilikter boıynsha tıisti eskertpeler jasalyp, olardy joıý talap etildi. Qazirgi tańda atalǵan eskertpelerdiń barlyǵy joıylyp, nysandar teńgerimge qabyldandy. Qazirgi tańda barlyq tehnıkalyq jáne ınjenerlik eskertpe tolyqtaı joıylyp, nysan óz qyzmetin qalypty rejımde jalǵastyryp jatyr, — dep habarlady oblystyq densaýlyq saqtaý basqarmasynyń baspasóz qyzmeti.
8 aıǵa sozylǵan úzilisten keıin 2025 jyldyń 16 qazan kúni pýnkt resmı jumysyn bastady.
Aıta keteıik, «Aýyldyq densaýlyq saqtaýdy jańǵyrtý» ulttyq jobasy aıasynda Atyraý oblysynda 2023-2025 jyldar aralyǵynda 18 medıtsınalyq nysan salý josparlanǵan. Búgingi kúnge deıin olardyń 15-iniń qurylysy aıaqtalǵan.
Qazirgi tańda Qurmanǵazy aýdanyna qarasty Jambyl, Álipova, Jalǵyzapan, Jastalap jáne Arna aýyldaryndaǵy jańa medıtsınalyq mekemelerdi balansqa berý protsesi júrip jatyr. Al qalǵan 3 nysannyń qurylysy jalǵasyp jatyr. Jergilikti bılik bul jumystardy jyl sońyna deıin tolyq aıaqtaýdy josparlap otyr.